Odisha nung kinüngbui kinüngtsü tasümang kilometer 10 apur jaja

Bodhbarnü Odisha, Kalahandi nung kinüngbu kati kinüngtsü tasümang bener jajaba noksa nung angur. Kasa noksa nung par jala-a angur.

Bhawanipatna (Odisha), August 25 (Agencies): Yashi Odisha, Kalahandi nung kinüngbu kati kinüngtsü tasümang kilometer 10 apur jajaba sülen anogo ka lir Brihostibarnü state sorkari iba tatalokba kuli tejangja bushisüngdangtsü atema tuyuogo.
“Iba tatalokba bushisüngdangtsü atema Kalahandi District Collector-i tuyuogo. Bhawanipatna Sub-Collector dang iba tatalokbaji tekaraba nung bushisüngdanger osang agütsütsü atema tuyuogo,” ta state urban development minister, Pushpendra Singhdeo-i Bhubaneswar nung osangbenertem nem metetdaktsü.
“Sub-Collector Sukanta Tripathy dang, yashi yangi aliba hospital nung tribal nisung, Dana Majhi kinüngtsü tasümang abentsü atema pa nem gari mela asü memela, ibaji bushisüngdangtsü tuyuogo,” ta ketdangser kati ashi.
Bodhbarnü Majhi-i pa kinüngtsü Amang Dei tasümang apur jajabaji nisung kari angu.
Pa den arishi küm 12 jala dena liasü.
Arishi küm 42 Amang ji Bhawanipatna nung aliba district headquarters hospital nung TB tashitak ajanga asü.
Majhi-i teyari meshiaka hospital ketdangsertemi meyariba ajanga pa kinüngtsü tasümangji sü agi longdena apuloker Bhawanipatna nungi kilometer 60 pilar aliba par yimtsüng, Melghara-i apuso.
Minister, Singhdeo-isa, ketdangsertemi iba osang angashili tasümang abentsü atema ambulance gari ka yok, ta ashi.
Iba mapang nungjibo nisungba jagi kilometer 10 jajar liasü, ta minister-isa ashi.
Majhi aser par jala na kilometer 10 jajar lia local osangbener kari tena ngua district collector nem osang metetdaktsü, aser tanüngba kilometer 50 ji gari nung ao.
Local TV channel den jembidang Majhi-i, “Ni hospital ketdangsertem dang ni sensaker ka lir, anungji gari hire mesütettsü ta ashi. Ni kanga mepishiaka parnoki meyari,” ta ashi.