Train nung senzürtemi Insurance sen Lakh 10 tashi agizüktsü akok

New Delhi, August 25 (Agencies): Tan August ita 31 nü nungi tenzüka, train nung senzüsenpongertemi online nung ticket alizüktsü mekazükba ajanga senzüsenpongdang lendong ajuruba atema temenok insurance sen lakh 10 tashi agizüktsüsa renemtsüogo.
“Tan August ita 31 nü nungi tenzüka, IRCTC website nungi ticket alizüktsü mekazükertem nem poisa 92 premium sen agütsüba melena sen Lakh 10 tashi insurance tajangzük angutsü lenmang renemtsüogo,” ta tongti Railway Ministry ketdangser kati tanü, Brihostibarnü metetdaktsü.
Train ticket alizüktsü mekazükdang senzüsenponger ka nem senzüsenpongdang lendongtsüdong ajuruba atema temonok insurance sen agizüktsü maongka agütsütsü renemba olen ka India Railway Minister, Suresh Prabhu-i par ministry budget onük jembidang tawa metetdakja liasü.
Yimti ka kübok tesem ka nungi tesem tanga ka tonga train nung senzürtem dak alaka, train class mashika nung jajar senzüsenponger shia nem tan maongka tajung ya agütsütsü renema lir.
Train nung senzüsenpongertem nem insurance agütsütsü mapatong ya mezüng tendanga inyakdangba sülen kasaji takok ngua inyaktetra, train nung senzüsenponger nem insurance agütsütsü mapatong ya teti atema benshitsü tebilemba lir.
Ajisüaka, insurance agizüktsü tajangzük ya arishi küm 5 ser tekübok aser bendangertem nembo magütsütsü.
“Insurance sen agütsütsü maongka ya confirmed, RAC aser waiting list ticket abener senzüsenpongertem nem dang agütsütsü renemogo,” ta ketdangsersangi osang jangjashitsü.
Train nung jajadang tasüba mesüra peisasa mejajatettsüsa aser marakzütettsüsa lendong ajurur senzüsenponger/pei kinüngtsü, chirnur nem temonok sen lakh 10 tashi agütsütsü asoshi tan mapatong ya tenzüker lir.
Ano, tan mapatong kübok yiruaka, peisasa arakzütetter nem temonok sen lakh 7.5; taneptsü bushia mozükidang amongba temonok sen lakh 2 tashi aser kiralongrar, rakzükratem, injang lendong, mi aser iba amala train lendong nung asür tasümang lendong atalokdak nungi pei talidak tongtsütsü atema temonok sen 10,000 tashi agütsütsü densema lir.
Iba mapatong ya sorkari nungi temelaba agiba sülen IRCTC-i ICICI Lombard General Insurance, Royal Sundaram General Insurance aser Shriram General Insurance tentettem den aroki longjemer tenzüka lir.