Cricket asayar Dwayne Bravo tan mezüngsüa Bollywood nung ken atentsü

August 25, 2016 : ‘Tum Bin’ ken ajungbena nüngtugu akümba sülen küm 15 lir külen Anubhav Sinha-i iba telok Aditya Seal, Aashim Gulati aser Neha Sharma nungeri tongti shilem agiba film ka nung zükloker anir aoba Mirror osang ajanga mezüng metetdaktsü.
Angashiba agi film yanglur jagi Bhushan Kumar den külemi film produce asütsü aser ‘Champion’ ken atensang, West Indies nungi cricket asayar, Dwayne Bravo-a kasa film nung ken tekara, ‘Jager Bomb’ atentsü atema aniokogo.
“Iba kenji film otsü den kanga putepa lir aser onoki iba ken ya kanga teyakyak nisung ka nem tendaktsünüa aliba mapang ka nung Dwayne indang manager Shehan Raj ajuru. Anungji iba mapang pa iba ken nung shilem agidaktsütsü atema renema jembi. Ken ya Ankit Tiwari-i mejem aser pa den Dwayne aser Harshi Mad nungeri atentsü,” ta Anubhav-i osang tejangja metetdaktsüogo.
Iba ken nung tsüngsangtsüpur Romania nungi anir arua lir aser iba ken indang video ji club ka nung mesüra studio indang club nung tangoktsü. Iba ken atema Dwayne-i Hindi kar angazüktsüsa akümtsü.
Anubhav-i tesüsa direct asüba film ji, Shah Rukh Khan aser Kareena Kapoor Khan nati tongti shilem agiba ‘Ra.One’ film lir aser iba film indang ‘Chammak Challo’ ken America nunger ken zülur, rapper aser kentener Akon-i aten.