Party ajak nungi lenirtemi J&K semdangtsü

Srinagar, August 25 (Agencies): Brehostibarnü Union Home Minister, Rajnath Singh-i, Kashmir nung yimjung melira India tarutsü tiaji mabensa asütsü, ta ashiba den külemi Kashmir nung tesünep atema party ajak nungi teshimtet telok kati state semdangtsü, ta metetdaktsü.
July 8, 2016 nü Kashmir nung Hizbul Mujahideen commander, Burhan Wani tepsetba sülen anogo ka lir July 9 nü nungi tenzüka Kashmir nüburtemi longkak aita sepaitem den raradang nisung 70 jungnüa süogo.
Tanü Srinagar nung osangbenertem senden ka nung jembidang Rajnath-i, lokti azüoktsü atema injang tila amshiba anentsü atema tanga lenmang ka bushitsü, ta metetdaktsü.
Srinagar nung tesüiba anogo ana tsüngda Home Minister-i state nung yimtenren party balala nungi lenirtem densema nisung 300 shi den Kashmir tensa indang o lemtepogo.
“Ajaki tanaben tesünep lidaktsüner. Iba tensa atema onok jashir. Nisung jenti asüba atema onok jashir,” ta Rajnath-i ashi. Tanü pa den state Chief Minister, Mehbooba Mufti-a liasü.
Separatist lenirtem aitsüba olen ka nung Union Home Minister-i, “Kashmir nunger lanur tarutsü tia den nisungtemi asayamenü masütsüla,” ta ashi.
“Parnok (lanurtem) ket nung long masü saka kaket, kolom aser laptops bena alitsüla. Onoki Kashmir lanur tarutsü tiaji India tarutsü tia den sendakteptsüner. Ni Kashmir nüburtem dang timtem adokdaktsürtem jangjatsü mepishir,” ta ashi.
“Kobi melii yimtenren party balala nungi lenirtemi state semdanga Kashmir nung tensa süngjemtsü atema lenmang bushitsü, iba atemaji renema atatsü asoshi ni state sorkar dang asüngdangogo,” ta paisa metetdaktsü.