DNSU-i AFSPA agientsü akanger

Dimapur, August 25 (TYO): Dimapur Naga Students’ Union (DNSU)-i India government dang Naga lima nungi Armed Forces Special Powers Act (AFSPA) agientsüla ta nenshia metetdaktsüogo.
Iba ama tetsübutsü ozüng ajanga sepaitem nem nübortem dak mashimashi inyaktsü tashi agütsüba ya meimchir temeten anema dang masü saka lima nung democratic lima tulutiba, India lima ka ama asoshi mapet aser temenünütsüka akümer, ta kaketshirtemisa ashi.
India ya yimjung yangluba lima ka lir anungji AFSPA ama ozüng tamajung anema ola adoktsüla. Naga nungertemi yimjung aginür, anungji iba tejangraba aser teyongyabaji India sorkari metettsüla ta DNSU-is ametetdaktsü.
AFSPA ozüng ya sepaitem nem agütsüba hadir tesashi ka lir, iba tashiji amshia sepaitemi nübortem tsübudakja timtemdaktsür. Naga lima nung atalokba reshikangshi timtem aika Naga nungertemi aremzükogo aser tang tashi nung tetsübu tia nung dang lir. Iba tensa tia nungi Naga nungertem kümzüktsü asoshi Naga lima nungi AFSPA tangsa agienang ta Dimapur nung Naga nunger kaketshirtemi metetdaktsü.