Rohingya Muslim nunger dak sentakba nung sorkari state tenet senden ayonger

New Delhi, July 06 (Agencies): Rohingya Muslim nunger lakh ka dak tema India-i arua aliba asoshi tebilemtsü kaa iba dak sentakba onük lemteptsü asoshi Centre-i July 20 nü state 7 nungi ketdangsertem den senden ka amentsü ayongzükogo.
Iba senden nung state tenet nungi Principal Secretary tem (Home) adentsü, aser senden nung Rohingya Muslim temi India tsür tem den kibong akümba tebilemtsü onük süoka jembitsü, ta tanü sorkar ketdangser kati ashi.
Mezüng asadangba ajanga ashiba agi, tang linük nung Rohingya muslim nunger lakh 1.3 shi lir aser parnok timba ka Uttar Pradesh, West Bengal, Andhra Pradesh (talisa Hyderabad), Kerala, Assam Delhi aser Jammu & Kashmir state tem nung lir.
“Rohingya Muslim nunger ya par linük Myanmar nung reshikangshir. Ibayongji par züngsemtemi tali-tabong inyaka aonungbo ta tsübua bilemer. Asenoki mazüokteti makümdangyongi asenok kümdangtsüla,” ta kertdangserisa ashi.
Deputy National Security Advisor Arvind Gupta-i iba onük nung Home Department nung ketdangsertem aser Central law enforcement agency tem den o lemteta aruba sülen ita ka shi lir tang state tenet nungi Home department ketdangsertem den senden amentsü ayongogo.
Rohingya Muslim temi India-Bangladesh arrtsülen nungi India telungi aiter aser parnok aika ket nung UN Refugee agency, UNHCR-i agütsüba identity card lir, aser iba yongji parnok apuyonga idangyongjisabo par linüki meyipa meyokteter.