CHANGKIKONG LENMANG SHIBAI YANGLUTSÜ (?) NÜBOR TAKANGBA OLA

Küm ishika tejaklen taoba Chief Minister Neiphiu Rio road show atema iba lenmang ajanga süia aodang “Nagaland nung iba ama lenmang lir na(?)” ta aoksa jembiba nübortemi HOT NEWS/BREAKING NEWS amai jembitepogo.
Nagaland state koma tambur yamaji iba lenmang tambur lir. Iba lenmang Official (PWD) tenüngji Mongchen-Mangkolemba road ta ajar. Kodanga black-topping meyangludangba lenmang. Lenmang tozükli nungi tawa tsüngküm tashi kasa dang aliba lenmang (all weather motorable). Saka 2015 miiwa tenzükli nungibo iba lenmang nung gari aser nisung tetsüng agi senzütsü mejungi küma lir.
Ajaki angatettsübaji ya; Mangkolemba ya tzükong asem sanger Head Quarters asünung talisa Changkikong nung Mongchen nungi Molungyimsen yim trok sanger kechi nüngdak südir süaka private/official, normal/urgent/emergency, shishilempatsü atema, shiranger mozü ki bushia arur, tasü-tama lendong, item ajak nung Mangkolembai arudang aser Mangkolemba nungi aodang, Waromong, Debuia, Mongchen item yimtsüngtem lenmang majungba agi Changki-Longnak ajanga senzür. Yimjenkimong, Molungkimong aser Molungyimsen Assam ajanga senzüa arudagi. Rongsen timba, mapang talangba indoker aser anibelem jenti agia yamala timtem tepang agi mejembitetba jenti nübortemi ajurua arudagi.
Tanü nübortem iba tia jenjang nung aliba mapang shibai reprangtsü aser anepalutsü? Elected legislature jagi asü? Public leader jagi asü? NGO’s kari asü? Arogotem asü? Mesüra SHIBAI? Mokokchung, Kohima, Dimapur leni meyotetertem tsüraburtemi pei yimtsüng nungi jangotzü bener arua Mangkolemba nung tanur schooli yoker. Item student iba toushi tia nungi jenbua mali parnokang tali timtemer. Item students tia atema shibai aria bilemtsütsü?
Anungji Mangkolemba nung alir yim terok union-tem (Mongchen, Dibuia, Waromong, Yimjenkimong, Molungkimong, Molungyimsen) telongjem tenüng nung union terok president-tem longjemer Nagaland State Government dang nübortem timtemba tia ya reprangtsü akanger :
President tenüngtem :
1. Shri. Temsükaba Mongchen
2. Shri. Chubamaong Dibuia
3. Shri. Tekalemba Waromong
4. Shri. Masaliba Yimjenkimong
5. Shri. Imnayongdang Molungkimong
6. Shri. Tekanükshi Molungyimsen