Sentem tulu agi sen aputsütsü memelar

Dimapur, August 27 (TYO): Tanü asen Naga nunger loktiliba nung kija mesüra teloktemi sen tetemlok tulu agia sen aputsüba  tebilemtsütem reprangteta tanü Honibarnü Ao Senso Telongjem Dimapur (ASTD)-i telemtetba kar agiogo.
Tanü yangi osangbenertem den jembidang, sen aputsütepba maparen ajanga kibong aika takoksa ajuruogo, aser nisung aikati sen apuba meyipa magütsütetba agi pei kiojen yokdoka sentsüh odokba tensatem ajuruogo, ta ASTD tir, Wb. Sobu Jamiri metetdaktsü.
Iba lokti tebilemtsü koktettsü aser sen apuba maparen tiptema inyaktsü atema Ao Senso Telongjem Dimapur (ASTD)-i tetuyuba kar agütsüogo aser iba mapa inyaktsü atema ASTD kübok yimtsüng unit nem tashi agütsüogo, ta paisa ashi.
Kija aser telok aikati sen tetemlok tulu agia sen aputsür aser parnoki ita shia tetemlok 5 % nungi 10 % tsüngdasa agir. Iba dak sendakba nung ASTD-i ita ka atema sen tetemlokji 3% dang agitsü aser sen aputsür shingaia iba dak nungi alia magitsüla ta lemtet, ta  ASTD Tir-isa metetdaktsü.
Sen apuri mapang telatet tsüngda sen magütsütet nunga sen aputsür shingaia sen tetemlok nung ano tetemlok mebendenloktsüla, aser tapur o taputsür na tsüngda inyaker taaji  sen apurtemi masü saka sen taputsürtemi agütsütsü lemtet, ta paisa ashi.
Sen aputsü atema kiojen mesüra kimunglumung sota ayutsüsa kümra, tangari masü saka bangdak ali kibur owner (pattadar)-i tezüluba nung sign asütsüla, ta ASTD tirisa metetdaktsü.
Aiben nisungtemi linük tenzükertem okadak senpu-tsüpuba nung ken o benoker, saka August 27, 2016 nungibo Aor kija, telok shingaia Naga nunger linük tenzükertem okadak iba ama ken o benoka khuret mebenloktsütsü tetuyuba agütsüogo, ta ASTD-isa metetdaktsü.
Aor kati tangar (kin mashii ka) nem sen aputsüra item tetuyubatem ya pa/la dak amshitsü, saka Aor kati tangar (Aor dak alia) dang nungi sen apura, item tetuyubatem ya mamshitettsü.
Item tetuyubatem ya ASTD kübok yimtsüng unit temi akangakanga amshitsü aser aibelenertem tapet temerenshi alitsü, ta ASTD Tirisa metetdaktsü.
Tanü iba senden nung  ASTD sanen luden den Dimapur Watsü Telongjem, Dimapur Ao Lanur Telongjem aser ASTD kübok yimtsüng shia nungi lenirtem dena liasü.