Temeim maliba teka

Tayaribo yarir saka temeim mali sen angutsü mechi yariba teka aser temulungjang agi alima nung sensaker aser mekokmeiner aika tebang agi ashitsü makokba tia nung timtemdaktsüdagi. Iba ama timtemji ka taoba hopta nung asenok aikati Odisha (Orissa) lima nung atalokba ka osangkaket nung ngur alitsü imlar. Iba tatalokba nung kinüngboi kinüngtsü tasümang mozü kidang nungi apur par yimtaki kilometer 60 tetsüng agi jajaa aotsü apuso. Iba anogo ya Bodbar August 24 nü liasü. Iba nisungba tenüngji Dana Majhi aser pa kinüngtsü Amang Dei arishi küm 42 par yim Melghara nungi kilometer 60 pilar aliba Bhawanipatna District Hosital nung TB tashidak agi asü. Iba mapang pa den par jala arishi küm 12 tain ka liasü. Iba osang angashidang asenok ka asünunga bendanglen pei kinüngtsü mesüra pei temeim tetsü süa yur komaka shisabolua lila ta bilemer. Ashiko, asenok dak yamajika atalok asübo asenokbo asenok ket nung meliaka kinunger, medemer mesüra yimtsür yimertem dang nungi teyari asüngdangtepa gari nung süli tayimtsü nung süli bener otetla. Ajisüaka, iba Odisha nungba yabo kasa timtemer aser makamaiter süaka asenok ama masü kangasa sensaker anungji pai pasasa gari ka bushia pa kinungtsü par yimtaki bener aotsüba tashiji mali.Ibayongji, pai mozü ki ketdangsertem dang tebutsü mang abentsü gari meshi saka magütsütet. Ashiko, mozü kidang ketdangsertem jagi gari agütsüka asünunga gari nungji pa jagibo totzüa meinoktetla, anungji mozü ki ketdangser mesüra tangar teyari meshia totzüji a enokla. Kinungtsü TB tashidak agi shiranga mozü kidang amongba mapangjia mozü kidang komaka laji yariar ashitsü makok, saka kinungtsü tasümang ka mozü kidang nungi kinungbo nem apulokdaktsür kilometer 60 jajatsüsa odaktsütetba temulungjangtemjibo meimchir mulungjang masü, kenyongi temeim maliba temulungjang aser teka asütsü. Pei kinungtsü tasümang sü agi longdena apuloker pa jala den külemi kilometer 60 jajatsü apusodangji iba nisung mulungjangji koteka züreper alitsü. Aji oda, iba osang angashiba dang masü saka osangbener kari ngua iba noksaji agir prokshiba ngua temulung ayangba agi iba talokba ya tanü tazüngertem den lemsateper. Atangji, iba osangji angashili minister kati gari yokba agi kilometer 10 jajarbo tanüngba kilometer 50 jibo gari nung oa yim atong. Ajisüaka, pei jala anir pei kinungtsü tasümang kilometer 10 apuloker jajaba otsüji temulung ashitsüka lir. Tia jungaka len  tom nung  osangbenerji ajurua noksa agir osangji mebenlenshi asünungbo tebu o par jala naji tetsü tasümangji bener iba aonungji len tom nung komaka timtemla ta temulung ayanga bilemer. Tanübo ibai Odisha lima nung atalokba indang jembir, ajisüaka iba kasa timtem ya anogo shia tesem aika nung atalokdagi. Itemji osangbenertemia mangur, yimsüsürtemi mangashir aser ketdangsertemia kecha hau ta mali toktsür. Iba amaji anogo shia tepetzük tia nung alir sensaker aika maksü aser timtem ajurur. Aji oda, asenoki mangur dang ashi Nagaland nunga tesem aika nung iba ama timtem ya ataloka alitsü. Asen lima nung sensakertema senotsü meindoki shilumanem mapang nung teyari angutsü asoshi government-i mozü ki aika lapoka yuja lir. Item mozü kidang inyakertem nem governmenti taa agütsür, anungji shirangertem angati yarir. Ibaji dang masü saka center government nungi sentong tapu balala ajanga mozü tapu balala yoker, anungji government mozü kidang amongertembo mozü dena angati angur. Ibaji dang masü saka shiranger aser tasümang abentsü asoshi mozü ki shia government-i gari yuja lir. Item ajakji nübortem atema aser nübortem rongnungsa süaka sensakertem yaritsü nükjidong nung item mozü kitemji yanglu aser sentongtemji latet. Ajisüaka, tanü tezüdangtsü kaji government mozü ki aika nung anepalur peria mali, mozü angati kecha mangur aser tang Odisha nung atalokba amaji asen lima nung  ataloknunga, ashiko mozü ki meyong gari malitsüa akok. Item ajakji temeim agi masü saka sen atema inyakba ajanga lir. Sen meimba yimsüsürtemi mozü ki nüngdak mereprangtsü aser sen kija atema inyakertemi timtemer mereprangtsü. Iba jagi shingaia mangu aser memetet ser anogo shi nisung aika Odisha nungbai ajuruba timtem aser maksüji ajurudagi. Iba tensa tiaji melenshitsü nüngdaker. Iba amaji sensakertem makmesüdaktsütsüla !