Mumbai-Pune Expressway nung ‘drones’ amshia traffic ketdang asür

Pune, August 28 (Agencies) : Deobarnü Pune-Mumbai Expressway nung traffic mita reprangtsü atema tang mezüngbuba atema drones amshi aser iba mapang driver 15 merenshiogo.
“Maharashtra sorkar nungi tetuyuba anguba sülen onoki ghat section (Lonavala exit aser Khalapur toll plaza) nung drone ana amshi. Iba drone ana jagi anatsülen vehicular traffic mita reprang” ta Superintendent of Police (Highways), Pune Region, Amol Tambe-i ashi.
Anüng nungi traffic mita reprangdang truck gari anishir parnok nisung 15-i ozüng alema gari aniba atema tai tonglokja apu, ta pai ashi.
“Parnok nem Urse toll plaza mesüra Khalapur toll plaza nung challan agütsü. Anüng nung drones-i mita reprangbaji tanü anüngdang 12:00 ako nungi nikongtsütsü 4:00 ako tsüngda liasü” ta Tambe-isa shisem.
Tawa tu Maharashtra nung Minister of State for Home (Urban) Deepak Kesarkar-i Mumbai-Pune expressway nung drones amshitsü ta osang metetdakja liasü.
Mumbai-Pune expressway ya ‘tasütsü sang’ ka ama lir ta Shiv Sena Minister Deepak-i iba mapang shia liasü.
“Gari timi maniba aser mashi aniba ajanga gari lenodngtem ataloker. Expressway kanga talang asünung onoki gari mashi aniba mita mereprangteter aser ano police nübo-a peria mali” ta paisa ashi.
CCTV camera tem amshia vehicular traffic azüoktsü koka lir, saka iba nung timtem kar lir aser iba jagi drones amshitsü mulungtet, ta Tambe-isa ashi.