EU linüktemi migrant nisungtem bendanga mebenshitsü ajungshir: Merkel

Berlin, August 29 (Agencies): European Union (EU) nung züngsemba linüktemi migrant nisungtem bendanga mebenshitsü tajungshiba olen ka Germany Chancellor, Angela Merkel-i metetdaktsüogo.
“EU nung züngsemba linük kari tamangba yimsü nung ajemdaker, migrant nisungtem par linük nung mejenokdaktsüi parnok bendanga benshiba osang angazükogo aser iba maparenji khen yongi magizüktetba maparen aser tangatetba lir,” ta lai ashi.
“Linük aser nisung shiai pei akokba inyaktsüla. Muslim nisungtem asüba yong migrant nisungtem pei linük nung mejenokdaktsütsü lemtetbaji tai lir,” ta lai nenshia ashi.
Taküm 2016 küm kisüng nung migrant nisung 300,000 shi Germany linük nung jenokdaktsütsü asoshi Germany sorkari renemba osang ka Germany sorkar ketdangsertemia metetdaktsüogo.
Par linük jenokdaktsütsü asoshi renemba migrant nisungtemji tongpang raraba aser Islamic State (IS) teloki bener arutsüba lendong tsüdong nungi taküm kümzüka alitsü meranger Afghanistan, Iraq aser Syria nüburtem aliba osang bushitetogo.
EU nung züngsemba linük 28 rong nungi linük karibo Mideast aser South Asia nungi aruba migrant nisungtem par linük jenoka melidaktsütsü lemtetba osanga bushiteta lir.