Yemen bomb lendong nung 54 shi pokset: Health Ministry

Aden, August 29 (Agencies): Peisasa pokseta asütsü mulungteter nisung kati car gari nung alenokba bomb pokdakja Yemen kübok Aden nung lendong kanga sashia atalokdaktsüba osang ka Yemen health ministry-i tanü, Hombar nü sangoktsüogo.
Tanü Yemen anülulentip tsütsü, tzüyimkümlen, Aden yimti kübok Mansoura district nung tentetba mitkar tesep nung lendong atalokdaktsübaji Islamic State (IS) kiralongrar teloki par Yemen nung lendong tesashitiba atalokdaktsür lir ta ministry-i ashi.
“Tanü lendong nung nisung 54 shi poksetba aser nisung 67 shi yiruba osang tang tashi nung jangjaogo,” ta health ministry nung director general, al-Khader Laswar-i osang jangjashitsü.
“Ozü züngsem kati Aden yimti nung nisung 60 shi tepseta tanü lendong atalokdaktsüogo,” ta IS telokia tanü lendong atalokdaktsüba atema tenüng agia par osangbentsü tentet, Amaq news agency ajanga metetdaktsüogo.
Tanü lendongji Yemen Tir, Abd-Rabbu Mansour Hadi-i aniba mitkar telok pusemer, Popular Committees züngsemtem nem tongpang raratsü terenemshiba agütsüdak aliba osanga jangjaogo.
“Tanü lendong atalokba sülen tasümang 45 shi aser yirur nisung 60 dak tema mozüki tonga bener aru,” ta angati agi nübur nem mozü mora teyari agütsür tentet, Medecins San Frontieres (MSF)-i ketdang asüba mozüki otongdaria metetdaktsü.
Hadi pusemer aser sorkar anemer, Houthi telok na tsüngda ita 18 shi tongpang raraba nungi tajangzük agia, IS teloki Yemen linük nung tan amala lendong mapang shia atalokdaktsüba osang bushiteta lir.
Par teloki Aden governor-ba taoba July ita tepsettsü merang saka iba lendong nung governor-ba taküm kümzüka liasü.
May ita nunga peisasa pokseta asütsü mulungteter IS züngsem kati car gari nung alenokba bomb pokdakja lendong atalokdaktsüba ajanga mitkar züngsem akümtsü terenemshiba agir nisung 40 shi poksetba aser nisung 60 shi yiruba osang jangjaogo.