Mid-Day Meal ken o nung Bihar school Principal küm 17 jail-i yoker

Chapra (Bihar), August 29 (Agencies): 2013 küm Bihar, Saran district nung aliba school ka nung tanurtem mid-day meal nung mim chisema tanur 23 asüba ken o nung school Principal küm 17 tepoukdak ayutsü obendang agütsüogo.
Additional District & Sessions Judge (II), Vijay Anand Tiwary-i August 24, 2016 nü Dharmasati Gandaman Primary School nung taoba mapang principal, Meena Devi aitsü, ajisüaka la kinungbu, Arjun Rai anema kuli manguba ajanga pabo chiokogo.
Court-i IPC section 304 aser 308 kübok la aija IPC section 304 kübok küm ter aser section 308 kübok küm tenet tepoukdak ayutsü obendang agütsü.
Iba dak alia court-isa section 304 küm senchi lakh 2.50 lakh aser section 308 kübok senchi lakh 1.25 chiogo.
2013 küm July 16 nü iba school nungji tanurtem sorkari agütsüba anogo tom chiyungba sülen tanur 23 tashi asü. Iba sülen Devi aser la kinüngbu naprong police-i pua liasü.
Iba ken o nung Devi kinungbu, Rai-a totzü tamajung agütsüba atema tai tonglokja liasü, ajisüaka pa anema kuli manguba ajanga pabo chiok.