Nagaland Angh-i yimjung atema mepishir

Dimapur, August 29 (TYO): Nagaland Angh, P.B. Acharya-i Nagaland nung teti atema yimjung bener arutsü mepishia metetdaktsü.
NSCN-IM aser India sorkar tsüngda Framework agreement sign asüba sülen telemtetba ka agitsü mapang tonga arudar, anungji Nagaland nung teti atema yimjung bener arutsü asoshi nisung ajak longjemtsüla, ta tanü Angh-i sangdong ka nung metetdaktsü.
“Prime Minister Modi lenisüba kübok iba tebilemtsü koktettsü mapang tajung lir. Anungji yimtenren telok ajak, NGO tem, kaketshir tentettem aser civil society ajaki Naga yimten telok balala nungi lennirtem den ajurutepa, parnoka yimjung olemtep nung adentsü aser külemi yimten ken o latettsü atema mapa inyakang” ta P.B Acharya-isa mepishia metetdaktsü.
“Myanmar Tir, U Htin Kyaw-i tang India semdangi aruba mapang NSCN (K) teloka olemtep nung adentsüsa teyari angutsü asenoki imladi” ta paisa ashi.
“NSCN (K) aser Centre sorkar tsüngda Ceasefire tenangzüktep agitsü atema Konyak Union (KU)-i kanga dang nendaka mapa inyakba atema ni parnok nem tenüngsang agütsür” ta Nagaland Angh-isa metetdaktsü.