Rahul-i UP nung constituency 223 sema senzütsü

New Delhi, August 29 (Agencies): Taruba hopta nungi tenzüka Congress tatong Tir, Rahul Gandhi-i ita ka piyong Uttar Pradesh state tesem aika sema senzütsü, ajisüaka pai lokti senden tulu ayonga makatsü, ta Congress Party lenir tain, Ghulam Nabi Azad-i Hombarnü metetdaktsü.
Congress lenir Rahul-i kilometer 2,500 telongtet nung Uttar Pradesh nung aliba assembly constituency 403 nungi constituency 223 sema senzütsü, aser pai ibaji September 6, 2016 nü Deoria nungi tenzüktsü.
Uttar Pradesh nung sorkar tasen shimtsü atema state assembly election agitsü ita trok shi dang anünga lir.
India nung nütsüng timba aliba state, UP nung Gandhi-i aluyimertem, tetsürtem aser lanurtem tsüngdong oa ajurua sensaksemtsü, ta Congress osang ka ajanga ashi.
Congress-i state nung sorkar balalai tamakok anguba aser state tesüleni atsüngzüka lua sensak tia nung aliba jungkai adoktsütsü, ta party-isa ashi.
Küm 30 jakdang Congress-i Uttar Pradesh yimsüsüsa liasü. Taruba election atema party-i chief minister candidate atema taoba mapang Delhi chief minister, Sheila Dikshit (arishi 78) tenüng sangdongogo, aser UP nung Cogress tongti atema taoba mapang actor aser yimtenren lenir, Raj Babbar shimogo.
Küm ana tejaklen Lok Sabha election nung Uttar Pradesh nung Congress nungi party Tir, Sonia Gandhi aser Rahul Gandhi nati dang takok ngua liasü.
Samajwadi Party-i ano maneni Akhilesh Yadav Chief Minister shimtsü ta imladar; Dalit lenir, BSP tongti aser chief minister pezüben inyakla, Mayawati-ia la nem ano khen maongka agüjang ta state nüburtem dang shiogo.
Tang tashi nung BJP-ibo chief minister candidate shima mali.