Sen apuba yimya

Ita ka nung 5% mesüra 10% tashi agi kiojen mortgage süa yutsür sen crore junga apuba agi asenok adianu aika iba sentsüji maotet, kiojen aser ali tapayutsüka sentsü melen tangar nem agidaktsüogo. Bilemdangra, iba ama sentem tulu agi sen apurtemji shisa kanga maka aser sen aputsürtemjia onsara morumoru aser sen meimba nisungtem asütsü. Shitakba agi sen aputsüba nükjidongji taputsür tajangzük angutsüba dang nungibo tapur tajangzük angutsübaji tuluba asütsüla. Iba jagi tanü center aser state kübok  sen aputsütsü asoshi bank aser Corporation tapu balala lapoka nisungtem yaritsü meranger. Iba kasaji private bank-temia inyaker. Aji oda, asenok state nunga state government kübok NIDC lapoka lir. Parnoki center dang nungi sen apua bener arua state aser private bank dang nungibo sentem kanga agia tajemba nung aputsür, kechiyong parnok nükjidongji nisungtem yariner. Ajisüaka, asenok aikati NIDC ama nungi sentem tila agi sen apuba nungia tajangzük keta meinyakteter, anungji sentsü maotetter, iba jagi sen apur o taputsür na prongla akoksar. Atangji, asenok Naga nunger sobaliba nung sen apuba mesüra dokan lapokba shishilembaba aser yoktenyokraba ya mali asü, anungji tang tashi asenoki sen apua tajangzük mapa inyaktsü kangabo mashi aser shishilembaba mapa tenzüka tajangzük angutsüsa yoktenyokraba maparen nunga aikati takok ngua meinyaktetter. Iba jagi asenoki mapa ka atema sen kwi apu nung mapang kopiga tsüngda sen  kwi tajangzük angutsü ta asüba ongko meinyakdangi sen apur. Ibayongji, aikati sentsü maotetter. Ibaji dang masü saka asenoki bank nungi küm ka nung noklang nung sentem 12% agi sen lakh ka apu nung iba sentsüji komaka aodoktsü ta asüba sentongji meinyakdanger. Iba jagi asenok aika kanga akoksar. Aji oda, asenoki sentsü maoba ajanga asenok dak bank aser sen aputsür teloktemi temulung melemtetter, iba jagi sen liaka asenok nem maputsür. Ano, asenok asoshi timtem kaji Municipal area nung tesem kar dak alaka asen li tuluka liaka iba tenüng nungji sen maputetter. Iba timtem jagi, asenoki mapunüyonga kanga nüngdak adokdangbo sentem tulu agi asüyonga senji aputsüsa akümer. Iba timtem jagi aika takoksa tulu ajuruogo. Asen loktiliba nung iba ama timtemi kibong aika aiba ngua, Ao Senso Telongjem Dimapur (ASTD)-i tang nungi Dimapur nungbo Aotsür Aoertem rongnungbo sen aputsürtemi sentem noklang nung 3% dak tali agi maputsütsüla ta lokti ozüng agi songtemogo. Shitakba agibo ibaji aika kechiyong 3% ji küm ka nung masü saka ita shia indang jembir. Ajisüaka, tanü tensa sen aputsürtemi ita nung 10% tashi agia aputsür aser tapurtemia kecha matidaki apur aser tesüsabo pei telikdak ki dena yutsür aotsüsa akümer. Anungji, iba ama rongsen penbuba temenen mapa nungi nübortem kümzüknüba agi ASTD teloki iba telemtetba ya agiogo. Atangji, iba telemtetba ajanga sen aputsürtema makoksatsü aser sen apurtema sen apuba tetezü aser nükjidong meteta inyakra takoksa mangutsü.  Ashiko, teloki sen 3% dak tali maputsütsü lateta yutsüaka, kari morumorua iba dak nungi sentem tali agi aputsütsü akok aser iba sentsüji tapurtemi maotetra taputsürji akoksatsü, kechiyong idangji telokibo taputsürji aitsütsü. Atangji, tamangba yimsü tsütsü bilemdangra, aikati sentem agi sen aputsüba ya aitsütsüa akok, ajisüaka sen tetemlok shitak agia tajangzük asoshi mapa inyakbajibo Yisuia Mathi 25 aser Luke 19 nung o entepba ka nung kiburi par kilirtem nem  tajangzük angutsü asoshi sen terara aputsür aeini aoba otsü ajanga asenoki angatetter. Tanü lima ya sen apur inyakba lima ka lir, anungji takarbaia pa yari aser sensakertemia parnok yari apua inyaker. Ibai kecha meinyaki sen rezünga ayuba putu masü saka apuli inyakli aser sentsüji aodokli ano apuli ta kena manen sen apu shia tajangzük tuluba tuluba ngua inyakba putu nung asenok alir. Anungji, sen apuba ya sensakba agi apur masü saka tajangzük aketba mapa tuluba inyaknüba agi apur,anungji sen apubaji maksü masü. Ajisüaka, taputsüri sentem tulu agi aputsübajiang tim masüba mapa asütsü, anungji tapur  masü saka taputsürjiang maksü ajurutsü ana nung lir !