Temer-i Brazil Tir inyaktsü tenangzükba agiogo

Brasilia, September 01 (Agencies): Taoba Brazil Tatong Tir, Michel Temer-i Brazil Tir tasenba inyaktsü tenangzükba yashi, Bodbar nü agiogo.
Brazil senate-i par Tir, Dilma Rousseff yimsüsütsü menden nungi anentsür ghonda ishika sülen arishi küm 75 tain Temer-i Tir tasenba akümtsü tenangzükbaji agia liasü.
Conservative yimtenren telok yimsüsür, Temer-i 2018 küm tatemlen election agia, Tir tasen shimba mapang tashi Brazil Tir menden abentsü temeten tan angur lir.
“Asenoki tanü Brazil sorkar otsü tasen ka tenzükshir lir. Ni küm 2 ser ita 4 tashi Tir menden abendang asen linük jenjang tajungba kümdaktsütsü nangzüker,” ta Temer-i metetdaktsü.
Brazil Senate-i anogo 5 tashi ken o angdangba sülen Senator 81 nungi Senator 61 tashi Rousseff Tir menden nungi anentsütsü vote agüja, la Tir menden nungi anentsüba osang jangjaogo.
“Brazil Senator-temi ozüng alema aibelena maliba Tir ka yimsüsütsü menden nungi agientsü telemtetba agiogo. Parnoki aibelena maliba nisung ka aitsüogo aser yimsüsütsü tashi tashiyim agi agiogo,” ta Rousseff-ia la Tir menden nungi anentsütsü lemtetba osang angazükba sülen metetdaktsü.
“Rousseff Brazil Tir menden nungi anentsütsü lemtetba ken o okadak tanaben benoktsü sentong lir,” ta Rousseff’er okatsür, Jose Eduardo Cardozo-ia metetdaktsüogo.
Brazil Senator-temi Rousseff Tir menden nungi anentsütsü vote agüja aka, la anema tarutsü mapang election nung candidate ama toktepa  shilem magidaktsütsü tenokdangbabo mebenoktsü renemogo.
Brazil’er rongsenren jenjang mejungi akümba mimbangtsü nükjidong nung Rousseff-i ozüng alema sorkar senpong nungi sen agizüka, Brazil linük indang senotsüren jenjang tajungba akümer ama sayuba aser yamaji inyakba ajanga par linük indang rongsenren jenjang tekübokba jenjang tonga bener aluba ken o nung aitsüba sülen la tan Tir menden nungi anentsür lir.