39 buba Nagaland ID & SO Badminton Championships tenzükogo

Dimapur, August 04 (TYO): Nagaland Roads & Bridges Minister & Nagaland Badminton Association (NBA) Tir, Y. Vikheho Swu-i lapoktsüba sülen 39 buba Nagaland Inter District & State Open Badminton championship 2015 tanü Mongolbar nü nungi tenzüka District Sports Council Stadium, Zunheboto nung asayatsü tenzükogo.
Asayamong lapokba sentong nung Nagaland Chief Minister, T. R. Zeliang tongti tesemdanger asütsü asoshi mezüngbo renem saka timtem kar ajurua pai shilem magitettsüa akümba yong Zeliang melenzüka, Vikheho-i tanü tongti tesemdanger shilem agia liasü.
“NBA-i kümshi ayongba asayamong nung shilem agitsüpur ajunga pela agizüker. Asenok ajaki külemi lungjemer inyakba ajanga asen Nagaland nung badminton sabang temaba jenjang nung ajungkettsütsü,” ta tongti tesemdangeri sentepa alir den lemsatep.
“Alima sülen anidaka, Nagaland nunga saisapongtsü sentongtem taoba mapang nungi temaba jenjang nung ayonga asayatsü tenzükogo,” ta shia, 2015 küm nungi tenzüka badminton asayatsü sayudak tentetba maparen nung Youth Resources & Sports Department-i NBA den yaritepba atema pela olen ka pai metetdaktsü.
Tan asayamong nung ochishia tendangtsü tangatetba nung All Nagaland Umpire & Referee Association (ANU & RA)-i tongti shilem agitsü melungba atema par tentet danga pelaba olen ka tongti tesemdangeri metetdakja liasü.
Tesülen, NBA züngsem aser Nagaland yimsüsürtem na tsüngda exhibition asaya ka tanü asaya liasü.
Tan asayamong nung Nagaland kübok densemba district 10 den külemi, Nagaland Police telok nungi asayar ajak agi 356-i shilem agitsü renema lir.
Tongti tesemdanger den külemi, Thongwang, Advisor DUDA; R. Tohanba, Parliamentary Secretary, Municipal Affairs & Economic & Statistics aser Toyang, Parliamentary Secretary, New & Renewable resources & Fire & Emergency Services nungeri tanü asayamong lapokba sentong nung shilem agia liasü.