Pakistan: Kiralongrartemi nisung 18 tepset; 43 shi yirutsü

Pakistan’er Khyber Pakhtunkhwa province kübok Peshawar yimti aser Mardan district na nung kiralongrartemi lendong atalokdaktsüba sülen Pakistan sorkar mitkartemi lendong atalokdak bushisüngdangba noksa ka yangi angur. (Peshawar, September 02)

Islamabad, September 02 (Agencies): Pakistan kübok mepetmesü agi sünga aliba Khyber Pakhtunkhwa province nung kiralongrartemi lendong ana tashi tanü, Hokolbar nü atalokja, ishiba agi nisung 18 shi tepsetba osang ka sorkar ketdangsertemi metetdaktsüogo.
Peshawar yimti nung Christian nisungtem kanga lungsoa aliba kiyong ka nung kiralongrar 4 tashi sorkar mitkartem amakba osang jangjaogo.
“Tanü kiralongrar nisung 4 tashi mitkartem den tongpang mapang tatsükba raraba sülen parnoki pei temang nung alenokba bomb pokdakja lendong atalokdaktsüba osang jangjaogo,” ta Additional Inspector General, Bomb Disposal Squad, Shafqat Malik-i osang jangjashitsü.
“Iba lendong nung kiralongrar 4 den nübur 1 densema, nisung 5 asüba aser mitkar züngsem 2, police ketdangser 1 aser nübur 3 tashi yiruba osang tang tashi nung jangjaogo,” ta pai shisem.
Ano, Mardan district & sessions okadak kimalena peisasa pokseta asütsü mulungteter kiralongrar kati grenade bomb ka pokdaktsüba sülen pa temang nung alenokba bomb pokdakja okatsür 4 aser police ketdangser 3 densema, ajak agi nisung 13 tashi poksetba osang ka District Police Officer (DPO), Mardan Faisal Shahzad-ia metetdaktsü.
“Kasa lendong nung nisung 41 shi yiruba osang tang tashi jangjaogo,” ta pai shisem.
Tanü lendong atalokdaktsüba atema Jamaatul Ahrar (JA) kiralongrar teloki tenüng agia metetdaktsüogo.
Par teloki Quetta Civil Hospital nung okatsür timba densema, nisung 73 tashi taoba August ita poksetdakja lendong atalokdaktsüba osanga jangjaogo.
“Kiralongrartem nem taidok magütsütsü. Ozü linük tesep tenteta alir kiralongrar ajunga  meshimeshia samatsütsü nangzüker,” ta shia, Pakistan Ato Kilonser, Nawaz Sharif-ia tanü lendong atalokdaktsüba atema aitsüba olen ka metetdaktsüogo.