Bodoland state tebilemtsü

August 31, 2016 nü All Bodo Student’s Union (ABSU), National Democratic Front of Bodoland-Progressive (NDFB-P) aser People’s Joint Action Committee for Bodoland Movement (PJACBM) nungertemi Assam kübok highway ishika nokdanger lungkak aitogo aser Centre o Assam state sorkar nati telangzüba tajung magütsüra ano maneni parnoki lungkak aittsü ta parnoki amokmeerena metetdaktsüogo. Centre sorkari tenangzükbatem agiaka aser BJP o Bodoland People’s Front tsüngda tesentaktep liaka, küm 30 tashi khanga aruba onük mesamai lir ta All Bodo Students Union-i Bodoland takhangba asentenshiba ajanga kuli agütsür. BJP-i Bodo nunger teloktem dang Bodoland balaka tentettsü atema yariteptsü ta nangzükba sülen Bodo state balaka tentettsü takhangba agüja lungkak aitba maparen ya Lok Sabha elections matongdang anena liasü. Iba onük atema Bodo nunger telungpurtemi 2014 küm Adivasi aser Muslim nunger 70 tashi tepset. 2012 nunga iba tesem nung kin o kin tsüngda mepetmesü adoka raradang nisung 70 dak tema taküm sama. Taküm assembly election atema nüboyimba mapang aser ano taoba Lok Sabha election atema nüboyimdanga, BJP-i Assam nung ‘bendanger’ ta asüba onük tejen kakteta jembi. Talisa, Lok Sabha election atema nüboyimba mapang Prime Minister Narendra Modi-i, bendanger ajak India toktsür aotsü atema renema alitsüla, ta jembia liasü. Iba onük jembiba ajanga Bodo nungeri state balaka tentettsü takhangba agüja mezüng mapa tenzükba mapang lepa bener arur ama aküm. Tanü Northeast ta ajaba tesem nung alir mezüngpurtem rongnung Bodo nunger dena lir. Parnok ya scheduled tribe lir aser northeast nung lisopurtem rongnung nütsüng timtiba aliba kin ka lir. Bodo nunger nütsüng yongsükji million 1.5 shi ka asütsü ta asadangteta lir. Bodo nunger ya Assam aser anameta aliba state tem nung prokshia lir saka parnok nütsüng teimbaka Bodoland Territorial Council (BTC) telongtet kübok aliba district tem nung lir. 1952 küm nungi Assam nung Bodo aser Muslim nunger tsüngda mangatettep adok. Bodo aser Muslim nunger tsüngda mangatettep adokba nung tongtipang onük asemji, litsü madak ketdangsüba tashi, vote angutsü atema yimten mapa inyakba aser nübo agi tangar memenepertem nütsüng teimba renlokba indang liasü. BTC tesem nung Bodo nunger nütsüng teimba liasü saka 1990s meta ka Muslim nunger alu mapa inyaktsü aser kisüjensü mapa inyaktsü atema arutsü tenzük, aser küm metsü majungdang Kokrajhar district nungbo Bodo nunger dang nungi Muslim nunger nütsüng teimba kümadok. 1976 küm Bangladesh nungi nisungtem kanga aruba ajanga Assam anokshitsü tenzük aser Assam nungertemi iba onük atema ola adok. Iba jagi Assam nung ‘anti-foreigner’ maparen tenzük. BTC telongtet nung Bodo aser Muslim nunger tsüngda obang meputepba aser temulung melemtepba tuluba küma aoer aser mapang shia iba tesem nung non-Bodo kintema timtem ajurua arur. Paul Brass-i züluba ‘The Politics of India since Independence’ kaket nung Assam nung kin o kin balala tsüngda, Hindu aser Muslim nunger tsüngda, lendenlen aser tenemlen alirtem tsüngda mangatettep aliba onüktem aika indang shia lir. Assam nung Bodoland state balaka tentettsü takhangba agüja mapa tenzükba ajanga lendong tulu bener arutsü ana nung lir, anungji Centre aser state sorkari lungkak aitertem den ajurutepa tekaratiba nung telatetba ka bener autsü atema olemtep tenzük nung ajungtsü amai ajiteter.