Tesayur mapaji kanga akhümket mapa lir: Angh PB Acharya

Dimapur, September 02 (TYO): Tesayurtem anogo salem osang lemsatepa tanü sangdong ka ajanga Nagaland Angh, BP Acharya-i, tesayurtem anogo ya India tesem ajaklen September 5 nü ayonga tesayurtemi lokti aser linük atema inyakba asoshi tenüngsang agüja amunger; September 5 nü tesayurtem anogo amungba kuli ka lir, ta metetdaktsü.
“September 5 anogo ya India Tir mezüngbuba aser kanga akhümtsübua aliba tesayurtem rongnung ka, Dr. Sarvapalli Radhakrishnan asoba anogomung lir. Pai shisaliok atema kanga nendaka inyak. Dr Radhakrishnan-i asenok dang tesayur ka asübaji koda tongtibang, ibaji teti bilemtetdaktsür. Pa asoba anogomung nung tesayurtem anogo amungba ajanga Dr. S. Radhakrishnan tasayubatem aser pa taküm otsü ajanga asenok ajungmesodaktsütsü maongka agütsür,” ta Angh-i ashi.
“Tesayurtemji asen loktiliba nung tongtiret lir. Kaketshirtem taküm tajungtiba nung azüoka India senso tajung kaka akümtsü asoshi parnoki tongtibang shilem ka agir. Linük tarutsü tiaji class takdang aser tesayurtem mapa ajanga aniteter, anungji tesayurtem nem tetushi agütsütsü nüngdak aser loktii parnok akhümtsübutsüla,” ta Angh-isa sangdong nung shia lir.
“Sanskrit oshi nung ‘Maatha Pitha Guru Deivam’ ya nüngtugu oren ka lir. Iba orenji ‘Tetsü Tebu Tesayur Tsüngrem’ lir. India nunger sobaliba nung tasoba anogo nungi tasünü tashi tetsü, tebu, tesayur aser Tsüngremi shilem balala agir. Taküm nung libalirotsü aser ochi metettsü atema len anirji tesayur lir. Asenok dang taküm nükjidong rajemdaktsüsangji pa lir. Anungji tetsü aser tebu sülenbo taküm nung tsüngremji tesayur lir,” ta paisa ashi.
Tesayurtem ayongzüka Angh-i, “Iba anogo nung ni tesayurtem dang iba ya lemsatepner. Taküm ka anitetba nung tesayur ka shilemji kanga tongtibang. Nü mapaji kanga akhümket mapa ka lir. Tajung rongnung tajungtibapur nem ang tesayur mapa agütsütsüla. Tesayur ka ama naji shisalen sayur, aniteter aser medemer ka lir. Lecture ajanga tesayuba agütsüba dang masü saka kaketshirtem nem tashi agüjang. Tanü putu nung kaketshirtem matsüngdang tayongzükbatem jenti lir. Tanü putu nung tetoktepba kanga lir. State nung asen kaketshirtem atema asenoki rejutem tajungtiba nung amenoktettsü,” ta ashi.
Paisa, “Azüng-zülu metetba nung Nagaland-a tejakleni odar ta meteta ni pelar, aser iba ya nenok ajanga lir. Tesayur tajung kati tekolok mejungi aliba tanur kata techira kümdaktsütet,” ta shisem.
Ano kaketshirtem ayongzüka Angh-i, “Ni kaketshirtem danga tesayur aser tsüraburtemji asen atema tajungtiba bilemtsürtem lir ta bilemteta parnok akhümtsübutsü mepishir,” ta Angh-isa sangdong nung metetdaktsü.