Naga yimjung tenangzüktep ajanga state tem kongshitsüa akok: Assam CM

Guwahati, August 04 (Agencies): Mongolbar nü Assam Chief Minister Tarun Gogoi-i, Naga Peace Accord dak sentakba miimshia inyakba ajanga Assam, Manipur aser Arunachal Pradesh state tem kongshitsü akok, ta ashi.
Sangdong ka ajanga Assam CM Gogoi-i, iba ama tongtibang document ka telung nung ayuba ajanga iba indang onüktem nung tasüngdangba arur, ta ashi.
“Iba ya ajangasa, yimjung tezüngzüktep ajanga Assam, Manipur aser Arunachal Pradesh kongshitsü südi ta bilemer,” ta Assam CM-i sangdong ka ajanga ashi.
Gogoi-i, mapang talangka Naga teloki raraa aruba sülen tangatettep kati aruogo, saka iba tezüngzüktep indang kechiba telung nung ayur’ar süngmanger, ta ashi.
“Ministry of Home Affairs-ia iba tezüngzüktep indang ya telung nung ayur ta olen jembiogo,” ta Gogoi-i ashi.
“Nagaland nung yimjungji onoki pela agizüker aser Naga onüktem telemtetba ka dangi aruba asoshi pela agizüker, iba ya ajanga Nagaland nung yimjung aser azükaru asüngsashitsü. Saka Assam anema mera kar danga agira iba asoshibo onoki sashia anema noktaktsü,” ta Assam CM-isa metetdaktsü.