Alimai N Korea den kümdangshia jembishinütsü nungdaker: Putin

Vladivostok, September 03 (Agencies) Alimai North Korea den tang aliba tensa den tamajungba mekümdaktsütsüsa par linük den kümdangshia jembishinütsü tajungshiba olen ka Russia Tir, Vladimir Putin-i tanü, Honibar nü metetdaktsüogo.
Russia kübok Vladivostok yimti nung ayongba shishilembatsü senden ka nung onük jembidang Putin-i iba olenji tanü metetdaktsü.
Kasa senden nung South Korea Tir, Park Geun-hye aser Japan Ato Kilonser, Shinzo Abe natia shilem agiba osang jangjaogo.
“Pyongyang den tensa tamajungba mekümdaktsütsüsa alimai par linük den tali kümdangshia jembishinütsüla. Par linüki tenzükba tongpang nung amshitsü nuclear osettsüset yanglua tendangba aser kasaji rizüngba mapatong anentsütsü atema par linük den alima sabang nung senden tanaben menshitsü nungdaka kümogo,” ta Putin-i nenshia ashi.
“Tensa tamajungba kümdaktsütsüsa inyakba maparen ajungai takoksa bener arutsüba den külemi, mangatettepa tali adokdaktsür,” ta shia, Pyongyang-ia United Nations (UN)-i tuyuba ama inyaktsü tajungshiba olen ka Putin-i sangoktsü.
Ano külen, “Pyongyang-i par nuclear mapatong anenba ajanga alima aser par linük na tsüngda amalitep tajungba alitsü,” ta shia, Park-ia N Korea-i tenzükba nuclear mapatong anentsü ajungshitsü atema Russia aser tanüngba alima tashi abenba linüktem ajungshia liasü.
“Pyongyang-i par nuclear mapatong anentsü mulungtettsüsa alima tashi abenba linüktemi aroki lungjemer par linük ajungshitsü nungdaker,” ta lai ashi.
UN-i tenokdangba sentong benok aka, Pyongyang-i par 4 buba nuclear tongpang oset taküm January ita tendanga kadokba den külemi, ballistic missile ishika tendanga kadokba ajanga alimai tebilemtsü khuret benoka lir.
Pyongyang-i tesüsa par submarine rong nungi ballistic missile ka Japan tsütsüleni taoba August ita 24 nü tendanga kadokba osang bushitetogo.