Philippines nung nisung 14 pokset; jenti yiru

Philippines anülulentip tsütsülen, Davao yimti nung abu Sayyaf telungpur teloki pokshitsü lendong tesashi ka atalokdaktsüba sülen Philippines police ketdangsertemi lendong atalokdak bushisündangba noksa nung angur. (Davao, September 03)

Manila, September 03 (Agencies): Philippines anülulentip tsütsülen, Davao yimti nung tentetba shishilembadak pokshiba lendong tesashi ka yashi, Hokolbar nü atalokba osang ka sorkar ketdangsertemi tanü, Honibar nü metetdaktsüogo.
Philippines Tir, Rodrigo Duterte’er jila, Davao nung atalokba bomb lendong nung nisung 14 shi poksetba aser nisung jenti yiruba osang tang tashi nung jangjaogo.
Yashi lendongji Duterte mapang shia anenzükdak, Marco Polo Hotel anasa tentetba shishilembadak atalok saka tang Davao semdanga alisang, Duterte-bo lendong atalokba mapang lendong atalokdak anasa maliba osang angazükogo.
Duterte-i Philippines Tir menden abenba jakdang, küm 22 shi tejaklen Davao yimti mayor inyakba osanga jangjaogo.
Philippines sorkar anemer, abu Sayyaf telungpur teloki tan lendong atalokdaktsüba atema tenüng agia metetdaktsüogo.
Iraq aser Syria na nung tesep tenteta, alima tesem balala nung lendongtsüdong kanga sashia atalokdaktsür kiralongrar telok tetsüti, Islamic State (IS) telok den sentaktepa aliba abu Sayyaf teloki sen meshizüka agitsü nükjidong nung nüburtem tashiyim agi pua ayuba, tashiyim agi pua ayurtem tekong tangja tepsetba aser tan amala bomb lendong balala Philippines nung mapang shia atalokdaktsüba osang bushiteta lir.
Ano külen, tan lendong atalokdaktsüba atema aitsüba olen ka sangoktsüba den külemi, par Philipines linük tensa azüoktsü nükjidong nung Duterte-i Philippines mitkar aser police nem tashi balaka agütsüogo.