Limaoneni züluba kaket tanabuba saya

Limaonen (achiji)-i züluba “Journey – Finding the hidden Gems” kaket EAC Sentilong Ozükümi sayatsüdang tangokba noksa nung angur. Mokokchung, September 3, 2016

Mokokchung, Sep 3 (TYO): Lanur kaket zülur Wb. Limaonen Imcheni English nung züluba kaket tenüng agi “Journey – Finding the hidden Gems” ta ser ka Honibarnü yangi Mokokchung nung Monyakshu EAC Sp. Sentilong Ozukumi meraketa sayatsüogo.
Iba kaket ya tezülur taküm otsü ka amai lir. Pa India lima aser bendangli Europe aser South America linüktem sema aser lia senzüdang pa taküm nung ajangshiba, timtem aser tayongzükbatem kar zülusema lir.
Pa taküm nung liyonga arudang pai ajangshiba aser tayongzükba ajuruba, item jagi lanurtem ajungmesotsü aser tensa tia balala ajurudang teimla agütsütsü nükjidong nung iba kaket ya züluba lir.
Kaket sayatsür EAC Sentilong Ozükümi mapang tatsüka agia jembidang, iba kaket dak tobur ajung kaji ibai ajak atema kaket ka lir. Yangi nisung ajak asoshi tagitsü langkabosa keta lir, ta ashi.
Iba kaket nung keta alibatemji; raraba ya yimjung atema asü?, ni atema ojala tuashi, tarutsü tajung atema na pungmang lir ma?, süngdong nungi tatishitsü anguba, Amazon Rainforest nung tebur chanu ka den aser ano tezüngnütsü tapu tajungtem keta angutsü.
Kaket zülur Limaonen ya Aliba nunger Wb. Lanukaba’r jabaso lir aser pa ya alima tesem balala sema aser lia senzür nübu ka lir. Pai temalena kaket tenüng agi “Nobody to somebody” ta ser ka zülua lir. Iba kaketjia nüburtemi kanga sabua züngdaki. Iba kaket nungji kecha masüba nungi jenjang tajung küma jangratema aliba liso nisung 6 aser bendanger 6 indang shia lir.
Iba kaket ya Mokokchung nung; Nata Company (Opposite FAC bus stand), Little Bunker (Milak Junction), Eastern Book Depot (MTBA basement) dokantem nung angutsü. Dimapur nung Om Book store aser Kohima nung ACLS book centre, Crossword nung angutsü. Iba den ano online (Ilandlo, Amazon.com) nungia alitsü akok. Kaket jenjang senpak 150/- dang lir.
Tanü iba kaket meshiteta aser temoatsü meshia Mokokchung Town Baptist Arogo (MTBA) Youth Evangelist, Wb. Temnamereni sarasadem aser MTBA Youth Mentor Anungla den sarasadema sentong tembang.