Temeshi tzünglu arutsü

Hosea ainkar mapang par nübortemi Tsüngrem o mangai aküm.Parnok temulungjang temerang aküm nungji parnoki Tsüngrem dang tashi angatsübaji mejangrai aküm. Tsüngremi parnok den jembibabo angashi saka iba o ji parnok mulungjang nung mamong. Anungji, Tsüngrem o parnok mulungjang nung amongtsü asoshi tsük metsü yoktsü asoshi ali tusaa anükanüka kümdakja alu alaba ama, parnok mulungjangjia anükanüka kümdakja renemtsübaji kanga nüngdaka liasü. Ali anükanüka tusar külenang aluyimertemi metsü prokba nung dang metsüjangji ali nung amonger aser tzünglu aruba mapang ali jagi tzünglujangji shitak agizükba amaji Tsüngrem taochi tzünglu aruba mapang, ibaji agizüktettsü atema nisungtem mulungjangji anükanüka akümtsüla ta Hosea ainkari nübortem den jembiba Hosea tapu 10 tekong 12 nung angutsü. Asenok Tsüngrem dak amangba purtem taküm aser temulungjang shia nung Tsüngremi jembiba o agizüktettsüsa meshiteta alitsüla ta iba Lai o agi ashir. Aji oda, asenok taküm aser temulungjang nung Tsüngrem temoatsü amongtsüsa asenok mulungjangji teti renema alitsü kanga nüngdaker. Tsüngremi asenok moatsüner, saka Tsüngrem temoatsüji asenok dak amongtsüsa renemtsübaji asenok mapa lir. Tsüngremibo asenok shinga timtema medoktsüner aser shinga mesamadaktsüner, anungji Pa taochi agi asenok den teti jembir. Ajisüaka, asenok temulung temerang asüba agi asenoki Tsüngrem taochiji mangatetter. Aluyimeri alu lar ayuba ali tanük nung dang metsü proka yutsüba agi tzünglu agizükteta metsüji mekuteta taküm küma meyitetba ama, kodang asenok temulungjang tanük küma renemer alidak Tsüngrem taochiji tzünglu ama arudir, idangjibo asenokia iba Tsüngrem taochiji agizükteta asen dak taküm alitsü. Iba jagi asen takümji tasen küma aiener. Tsüngremi kümzükba ajanga akhi nisung agi nisung tasen ka akümbaji ibaji lir. Yisu Khrista alimai arutsü anasa Yohan Baptitsübaia nübortem dang sayutsüngi dang, parnok mulungjang renemtsü asoshi ayimoktsü. Alima sobaliba nungbo tembar ka asenok dangi arutsü asüdang, asenoki kiojen renemer, ajisüaka asenok dangi Tsüngremer tekümtet aser temoatsü yokba agizüktsü  asoshibo asenok temulungjang renemtsüla. Tsüngremi asenok ajanga mapa jenti inyakner, saka asenok mulungjang merangba agi Tsüngremi asenok mamshitetter. Ibaji asenok asoshi takoksa aser lendong tulu lir. Atangji, asenok kar mulungjang nungbo Tsüngrem o mongdakja alitsüa akok aser kar takümbo Tsüngremi kanga amshia alitsüa akok. Aji oda, shirnok taküm aser kibong nung Tsüngrem taochi aser temoatsü amongba jangjaa meteta ali, item temoatsü osang tajungji asenoki tangar dang kuli asütsüla aser iba jagi tangar mulungjang nunga Tsüngrem o agizüktettsüsa anüka küma renemtsütsüla. Tsüngremi asen taküm nung mapa inyaktsü asoshi temulungjang renemtsü asoshi nüngdakbaji tashi angaba lir. Tashi angaba ajanga temoatsü arur. Itemji asen taküm mapa ajanga tangar dang mesüra asen chirnurtem dang kuli sütettsüla. Iba jagi parnok mulungjang nunga Tsüngremi mapa inyaktettsüsa parnoksasa renemtetter. Asenok den alirtem dak Tsüngremi mapa inyaktsüsa aseni renemtsütsüba mapaji aji asütsü. Tsüngremi temeshiba tzünglu yokba mapang aji agizüktettsüsa renema atatsü asoshi Hosea ainkeri nübortem dang Tsüngrem yimli aser Pa temeshiba bushitsü ajungshi. Anogo shia asenoki ochimashi aser tashiyim mapatem inyakaka, shitak inyaker amato bilema, kecha masü, kecha masü ta tarendak makai maneni inyaka aoba jagi asenok mulungjang merangba temaitsü sayur. Item taküm aser kibong nung Tsüngrem temoatsü mamonger, anungji ajungbena takoksa ajuru aser samar. Tanü asenok kar danga Tsüngremer taochi aser temeshiba tzünglu aruba temoatsü magizüktettsüsa temulung meranga lira, aluyimertemi alu nung metsüjang amongtsü atema ali anükdaktsüba ama, asenoki asen mulungjang anükdaktsüdi.