Naga Hoho-i CNTC nem kuli agütsür; Ao Senden & Sumi Hoho dang Federal Assembly nung adentsü mepishir

Dimapur, September 3 (TYO) : CNTC-i Naga Hoho den tesentaktep pilar ta asüba osang ajanga Naga nunger loktiliba nung mepetmesü adokdaktsütsü aser iba osang ajanga nübortemi mashileni anitsü ta Naga Hoho-i tanü sangdong ka nung metetdaktsü.
Iba dak sendakba nung Naga Hoho-i Ao Senden aser Sumi Hoho dang Federal Assembly nung adentsü aser idangji parnok tebilembatem lemsateptsü aser Naga nunger ajak atema telemtetba tajung ka agitsü atema mepishia metetdaktsüogo.
Nagaland state sorkari July 25, 2008 nü shidi ka ajanga Nagaland nung aliba Rongmei nunger nem ‘Indigenous Naga Tribe’ jenjang agütsütsü atema Naga Hoho dang nungi tebilembatem asüngdanga liasü, ta Communication Cell, Naga Hoho-i sangdong nung shia lir.
1963 küm Nagaland state metentetdang nungi arua aliba aser Indigenous Inhabitant ta jenjang agütsütsü temsüa aliba Rongmei nunger nütsüng bushitsü atema state sorkari tetuyuba ka agütsüba, aser December, 1963 matongdang Nagaland state nung arua aliba Rongmei nunger dang Indigenous Naga Tribe ta ajatsü mesüra parnok non-Naga Indigenous Tribes of Nagaland rongnung züngsemtsü ta state sorkari Naga Hoho nem agütsüba shidi nung asüngdanga liasü.
Iba dak sendakba onük atema Executive Council züngsemtem kijaibo senden telemtetba ka magitet asünung, September 5, 2008 nü Hotel Japfu Kohima nung Naga Hoho Presidential Council senden ka jazüka amen aser iba mapang Ao Senden, Sumi Hoho aser taoba mapang Kyong Hoho nungertem nungi teshimtet nübotema aden, ta Naga Hoho sangdong nungsa metetdaktsü.
State sorkar aginüba ama Rongmei nunger nem Indigenous inhabitant jenjang agütsütsü temsüa lir kechiyong April 28, 1997 nü Government Notification ka ajanga Kuki, Garo aser Kachari nunger nema Indigenous inhabitants maongka agüja lir, ta iba senden nung adenertemi tebilemba lemsatep.
Senden amenba sülen Naga Hoho-i sorkar dang Rongmei nunger nem Indigenous inhabitant agütsütsü atema mapa inyakba ludeni kanga dang nendaka aser shisadanga inyaktsü aser tarutsü anogotem nung telok balala tsüngda mangatettep madoktsüsa Nagaland state metentetdang arua alirtem dang dendaktsütsü atema inyaktsü metetdaktsü.
Naga Hoho-i Nagaland state sorkar dangi züluba shidi nung sorkari lemtetba pusema nungitba masü saka tebilembatem dang kar lemsatep. Item tebilembatemji Naga Hoho kübok aliba kin tentettem nungi teshimtet nübotem adenshia lia benokbatem dang liasü aser Ao Senden mesüra Sumi Hoho aser tanga telok shingaia sorkar dang sangoktsüba tebilembatem meyipa agir ta Naga Hoho dang meshidang, ta sangdong nungsa shia lir.
Ajisüaka, CNTC-i Naga Hoho dang sorkar nem agütsüba onüktem meyipa agiang ta ser anogo 30 lateta agütsü, aser ibaji August 31, 2016 nü tembang. Ajisüaka, Naga Hoho Executive Council-i Presidential Council mesüra Federal Assembly ajanga telemtetba agiba meyipa agitsü makok, ta Communication Cell, Naga Hoho-isa ashi.
Naga nunger kin balala nungi züngsemtemi tentetba Naga Organisation mesüra Naga Hoho nung züngsema maliba teloktem ajak Naga Hoho den jenjang tajemba telok/teloktem asütsü ta Naga Hoho Temzüng Arla 7 nung lateta lir. Tasen tentetba Naga Organisation kari Naga Hoho omen aser tetuyubatem kübok telok ka asütsü mulungra, parnok nem iba lenmang sadena lapoka lir. Ano, telok kari Naga Hoho den tesentaktep meyunüra Naga Hoho-i item telok madak tashiyim amshitsü makok, ta sangdong nungsa shia lir.
Tanü tashi Central Nagaland tribes Council (CNTC)-i Naga Hoho dang parnok telok tasen tentetba aser alizüngtem indang osang kecha melemsatep, ajisüaka Ao, Sumi aser Lotha kintemji Naga Hoho nung züngsema lir. Parnok sasep nung mangatettep kar aliba ajanga tangbo Naga Hoho nung Lotha Hoho densema mali. Lotha nunger atema recognised telokji taoba mapang Kyong Hoho liasü saka parnok ketdangpurtemi October 14, 2015 nü mapa nungi anen.
CNTC-i Naga Hoho nem teinyaktsü takhangba agütsübaji magizüker, kechiyong Naga Hoho-i Ao Senden aser Sumi Hoho dang langzüba dak alia CNTC nem telangzüba agütsütsübaji madoker. Ajak dang tongtipangbaji, Rongmei nunger nem Indigenous Naga tribe agütsübaji Naga Hoho ajanga masü saka state sorkar ajanga lir, ta Naga Hoho-isa metetdaktsü.
CNTC-i Ao aser Sumi nunger ajak tenüng nung tetuyuba agütsüba aser ano kin asem nungi ketdangpurtem dang Naga Hoho toktsütsü tetuyuba agütsübaji khenyongi magizüker. Naga Hoho den tesentaktep pilatsü mesüra züngsem agientsübaji Ao aser Sumi nunger Lokti Senden ka nungang telemtetba agitsüla, ta parnokisa ashi.
Naga nunger loktiliba nung Rongmei nunger onük kanga tongti süa jembitepba ajiteta Naga Hoho-i August 27, 2016 nü Media ajanga September 28, 2016 nü Kohima nung Naga Hoho Federal Assembly alitsü osang metetdaktsüogo aser iba senden nung “Tribe Recognition” onük tongti süa jembitsü ta shiogo. Anungji, Ao Senden aser Sumi Hoho-i Federal Assembly nung adentsü aser iba senden nung tebilembatem benoka lemsateptsü mepishia metetdaktsür, ta Naga Hoho sangdong nungsa metetdaktsü