Japan nung typhoon ‘Namtheun’ arutsü sangdongogo

Tokyo, September 4 (Agencies) : Japan kübok Kyushu asetkongleni typhoon ‘Namtheun’ tonga aruba ajanga asetkong nung tzünglu tesashi, tzüsem tulu aser tzümetsüng adoktsü, ta Deobarnü tsüngsang mopung tetzüba office nung ketdangsertemi metetdaktsü.
Japan’s Meteorological Agency (JMA)-i Kyushu anüdoklentip tsütsü aliba tesemtem iba yipru tesashi arudang renema alitsü metetdaktsüogo. Tang Kyushu anüdoklentip tsütsüsa anüdoklen aliba Iwate tesemtem nungbo tzümetsüng agi kongshia lir, ta EFE osang ajanga metetdaktsü.
Iba yipru tesashi ya tzüyim manung anodoklentip tsütsüi arur aser Deobar aonung mesüra Hombar anepdang Kyushu anüdoklentip tesem nung kongshitsü, ta linük nung osangbenertemi ashi.
Hombar anüngdang tashi nung Kyushu nung tzünglu 200 mm alutsü aser Shikoku & Kansai asetkongtem nung tzünglu 150 mm alutsü
Honibarnü Nakanoshima asetkong nung gondha ka nung tzünglu 129.5 mm aluba jangjaogo aser iba tesem nung tzünglu tesashitibaji ibaji alitsü. Ano Kyushu anülolentip tsütsüa mopung aser tzünglu tesashi agi kongshiogo.
Honibarnü Iwaizumi nung anentsüh aluba, tzümetsüng adokba aser süngdong lidong laoba ajanga nisung 622 tashi den tongtepratep kecha mesüteti liasü aser kasaji Kuji nunga nisung 212 dak atalok.
Japan Ground Self-Defense Forces nung inyakertem iba tesem nung nisung kümzükba mapang inyaktsü atema yokogo. Tang tashi nung iba lendong yagi nisung 7,026 dak kongshia lir.
Iwaizumi  nung aliba ki 2,400 shi nung electricity mali kümogo.
Tan hopta tetenzüklena Japan nung typhoon Lionrock agi kongshi aser iba mapang nisung 16 tashi taküm sama. Tang tashi iba tesem nung maneni nisung bushiba mapa inyakdar.
Typhoon Lionrock aruba ajanga tzünglu tesashi alua ayongtem nungi tzü metsüngteta adoka tzümetsüng jagi iba tesem nung kanga mejungi kongshi.