Will Smith-i Jackman melenzüka ‘Collateral Beauty’ nung shilem agitsü

Los Angeles, August 5 (Agencies): Hollywood star Will Smith-i Hugh Jackman melenzüka ‘Collateral Beauty’ nung tongti shilem agitsü renemogo.

Mezüng renemba ama, Australia nunger Jackman-i ‘Collateral Beauty’ nung tongti shilem magitettsüsüa akümba yong pa melenzüka arishi küm 46 tain Smith-i iba film nung tongti shilemji agitsü renem ta Ace Showbiz-i metetdaktsü.

Smith-i taküm nung timtem tulu ajurushiba advertising executive ka ama ‘Collateral Beauty’ nung shilem agitsü renemer lir.

Alfonso Gomez-Rejon-i direct süa yanglutsü renemba film nung amshitsü orena Allan Loeb-i renemtsü tenzüka lir.

PalmStar teloki nüngdakba senotsü inokba sülen Smith’er Overbrook Entertainment teloki Anonymous Content, PalmStar aser Likely Story nunger den külemi lungjemer iba ‘Collateral Beauty’ film ya produce asütsü.

Iba film ya taruba October ita nungi tenzüka yanglutsü sentong renema lir saka kasaji alima dang sayatsü anogobo tanü tashi lateta mali.

Jackman-i ‘The Wolverine 3’ film nung tongti shilem agitsü asoshi taküm May ita nangzüktepa aliba yong pai ‘Collateral Beauty’ film nung shilem magitettsüsa akümba osang jangjaogo.

Ano külen, Smith-i tang Deadshot ama ‘Suicide Squad’ film nung shilem tagidak lir.