Kü tesayur

Ni school azüngba mapang sayuba tesayurtem rongnung tesayur kanga tajung ka liasü. Pai küm nungi küm süitema onok sayudang kenü danga sodi magi. Sodi magibaji dang masü sodi anogo nunga pai par kaketshirtem ki semdanga lesson bushitsü ajungshia liasü. Anogo shia tesayurtem ajak rongnung anepdang pa tama school ki atong aser nikongdang pa tesü ao. Anepdang shia pai school tanurtem adenshidaktsür ken kar ayimayima tendaktsü aser sarasademer school tenzük. Pai class takdang nung lesson sayubaji otsü tajung ka ashir amai dang tanganütsüka liasü, anungji melamelaa angatet. Anogo shia amato pai lesson sayuzüker külen ano kidang inyaktsü mapa bener yok. Khen khen onoki kidang inyaktsü mapa meinyaki arudang pa kanga jashi aser onok dak pa tejak mekümloktsübaji süng ka azükba dang nungi tashiba amato bilem. Tanü linük nung tesayurtem anogo amongdang iba tesayurji menungraa bilemtetter. Tesasatsüka, tanübo iba tesayurji alima nung mali  menungraseta bilemer. Ajisüaka, pa tesayur inyakba mapang tepiyong nung sayutetba purtem aika nisung tajung kümer yimten, arogo aser lokti yaria angudang mulung anisüngzüker aser par chirnurtem tangar asoshi temoatsü küma amshiba aodang kanga peler. Joko, school azüng anener mapang talangka saka tanüa kasa kü tesayur amaji school shia nung tesayurtemi sayudar asütsü imlar. Tesayur mapa yabo ita sen kisüng atema inyaktsüla mapa masü saka taküm nung tesayur mapa inyaktsü jangratsüla. Sen agibo kodanga tenük masüngtsü, anungji sen atema tesayur mapa inyak nungbo jangratema meinyaktsü. Alima nung mapa tasaktibaji kecha memetetba nisung ka tashitemeteter kümdaktsütsübaji asütsü. Iba mapa nung taremzük kanga nüngdaktsü .Ibaji tesayur mapa. Tesayur kati pei class takdang nung aliba tanurtemji pei chirnurtem ama bilemer, anungji parnokji alima nung tangar  dang nungi tajungtiba südaktsütsü meranger. Iba nükjidong jagi tesayurtemji ano tanurtem dang nungibo lesson-a temerangba bushitsüla adoker. Tanü asüng balaka kaket ka nung langka zülua aliba metetnüra akhidang amato kaket ayokdak dokani aotsü menüngdak mesüra medemertem dang nungi meshia reprangdangtsü menüngdaker, kechiyong internet nung nisungi metetnüba ajak enokja lir. Ibayongji, kaketbo mazüng ser ajak metetter. Iba ama putu ka nung tesayur inyaktsübaji jangratemtsüka saka ano tarendaktsüka kechiyong ajak meteta melira tanurtem tsüngdang maksü ajurutsü ana nung dang lir. Aji oda, tanurtem teimbai ajak meteta lir amato saka tagitsübo kecha meinyaktetter ta asüba mapang ka nung school nung tesayuba yimyatema putu den apet melenshia sayutsü nüngdaker. Ajisüaka, tanü putu nung tesayurtemi akhi sayuba yimya nungi mepilai sayutsüba tongtibang mapa anaji kaket azüngtsü aser zülutsü sayuba mapa asütsüla. Joko, tanü asüng tanurtemi computer aser mobile phone nung dang mapang endoker asünungji temetetnübabo angur saka tashitemetetter makümer, kechiyong parnoki kaket mazünger aser nüngdaktem tezülua mezülur. Ibaji tanurtem asoshi tarutsü putu atema kanga lendong lir. Aji oda, school nung inyaktsüba mapa kaji, class tila nungi tenzüker temaba tashi nung kaket azüngtsü yimya sübadaktsütsü asoshi kaketshirtem atema kaketnang akatsüla aser iba kaketnang nungji hopta nung khenbo oagi mener kaket zünga kazütsüla aser kidangia bener oa züngdaktsütsüla. Tanü kü tesayurji taküm alinungbo, paibo kaketsa kaket zünger külenang ano internet nungi temetettsü talila bushia agizüker, item temetettsütemji bener arua anogo piyonga sayula. Kü tesayur jagibo asüng school nung oagi pai bushir renemba lesson tanurtem dang sayutsü matatetter. Pa ya talangka azüngba nisung masü saka pai pasasa meranga bushiba agi talangka azüngertem dang nungibo kanga agia tajungba. Onok rongnung lesson kangasa makokba mesüra tashi mangaba tanur kar dang lirabang, pai tanemi tsüraburtem jar item khurettemji lemsateper. Aji oda, tanurtem sayuba mapa nung tsüraburtem dena shilem agidaktsür. Iba jagi school nung sayuba mapaji jangratema kümdaktsür. Item ama pei taküm nükjidong ajak agi pei sayuba tanurtem tajung kümdaktsütsü asoshi temulung aser tanüla ajak bendanga agüja sayur tesayurtem  nem Tesayurtem Anogo salem tulu agütsür. Tsüngremi kü tesayur amaji tesayurtem ajak maojangma !