Kiralongrar pusemertem anema longjemer inyaktsüla: Modi

Hangzhou (China), September 04 (Agencies): Deobarnü India-i, BRICS linük züngsemtem dang kiralongrartem anema longjemer tesashiba raratsüla ta tayongzükba agüja Pakistan linük aitsüba olen ka nung Ato kilonser, Narendra Modi-i, kiralongrar nungitertem aser senotsü agi yarirtem longjemer temerenshi agütsütsüla aser parnok dang nungi pilatsüla, ta ashi.
Yangi BRICS (Brazil, Russia, India, China aser South Africa) lenirtem senden nung Ato kilonser, Modi-i, “South Asia mesüra tesem kecha nunga kiralongrartem indang bank tem mesüra raraba osettem yangluba factory tem mali,” ta ashi.
Paisa, “Ibaji ajanga, karibosa parnok nem senotsü aser raraba osettem agütsür ta kuli sayur, anungji BRICS linüktemi longjemer kiralongra anema tesashiba raraba dang masü saka kiralongrar pusemer aser senotsü agi yarirtem den pilaa alitsü atema longjemer mera agia inyaktsüla,” ta ayongzük.
Iba o ya China tembar, Pakistan anema jembiba o lir.
International jenjang nung BRICS olaji tulu ta shia Modi-i, iba teloki alima tebilemtsü onüktem atema inyaktsü asoshi khuret lemsatepa inyaker aser tang terenlokdak linüktem nükjidongtem ataloktsü atema yarir, ta ashi.
“Asen lokti aser linüktem atema amokmeren aser tashi meiti aliba kuli tongtiji kiralongraba lir,” ta paisa ashi.
“Tali bilemloka aoba tangatetba ajungkettetsütsü atema social media kanga bulua amshiba ajanga iba amokmeren tuluba  kümdar,” ta paisa shisem.
Tesülen BRICS külem sangdong ka ajanga, “Lenirtemi kiralongrabaji sashia aitsür, koba ajanga alima yimjung raksatsüba den külemi loktiliba aser rongsenkettsüng nung tetsükdaktsü adokdaktsür,” ta metetdaktsü.
BRICS linüktem ya alima nütsüng shilem 43, alima GDP shilem 37 aser alima shishilembaba shilem 17 lir.
BRICS senden nung Modi dak alia linük pezü nungi lenirtemji- Brazil Tir tasenba, Michel Temer, Russia Tir, Vladimir Putin, China Tir, Xi Jinping aser South Africa Tir, Jacob Zuma nunger dena liasü.