Abhinav Bindra ‘shooting’ nungi anisüngzüker

New Delhi, September 4 (Agencies) : Deobarnü India atema kija asaya nung Gold medal bener arutsüsang Abhinav Bindra-i ‘shooting’ nungi official süa anisüngzükba metetdaktsüdang, joko lanur tejangrartem nem iba maongka agütsütsü mapang tongogo, ta ashi.
“Tanü ya ni atema temulung shirangtsü anogo ka lir,” ta National Rifle Association of India (NRAI)-i pa den tepila sentong agidang Bindra-i ashi.
Tan tembangba Rio Olympics nunga pai tera agidang medal mangu saka pai India nungi osangbenertem den jembiba mapang tejak nung mepelaba kecha machitetdaktsü.
“Ni Rio nung 4buba jenjang ngutet aser küm 20 iba asaya nung shilem agia aruba sülen tang anisüngzüker. Ni Rio nung medal mongutetaka tatem azüa tembangtetogo,” ta pai ashi.
NRAI dang pelaba lemsatepba mapang, 2008 Beijing Olympics nung gold medal angusang, Bindra-i, NRAI-i iba asaya nung shilem agir ajak nüngdakba mapang shitak nung nungita yariogo, ta ashi.
“NRAI-i shooter ajak kanga nungita yariogo. Ni NRAI nem tenüngsang agütsür. NRAI Tir Raninder Singh lenisüba kübok iba asaya kangasa renloka melenshiogo,” ta pai ashi.
“Ni teti kanga meranga inyakba dak amanger. Meranga inyaktsüba dak alaka tanga lenmang kecha mali. Ni shooting atema kü ajak dang tali bendanga agüja inyakogo. Nenok ajak dang kanga pelar,” ta pai shisem.
Iba sentong nung Raninder Singh-i, onoki na atema inyakbaji kecha tuluka masü. Nai bendanga agüja inyakbaji ajak atema tatishitsü tajung asütsü, ta ashi.
2000 küm pa arishi küm 33 asüba mapang Sydney Olympics nung shilem agia tenzük.