Urjit Patel-i RBI governor mapa agizükogo

New Delhi, September 05 (Agencies): Dr. Urjit R. Patel-i RBI Governor, Raghuram Rajan mapa melenzükogo.
Rajan küm asem Reserve Bank of India (RBI) Governor inyakba sülen iba menden nungi anenogo; pa tanaben academia-i aotsü.
Hombarnü Central Bank sangdong ka ajanga, “2013 January ita nungi Dr. Urjit R. Patel-i Deputy Governor inyaka aruba sülen September 4, 2016 nü nungi pai linük nung 24buba Reserve Bank of India Governor mapa agizükogo,” ta metetdaktsü.
Dr. Patel-i küm asem iba mapa inyaktsü.
August 20, 2016 nü Cabinet appointment committee-i September 4 nü nungi tenzüka Dr. Patel küm asem atema shimtsü agizüka liasü.
Ajisüaka September 4 anogo ya Deobar anogo aser Hombarnü ji Ganesh benjung asübayong Mongolbarnü ang pai mapabo agizüktsü.
Taküm January 11 nü Dr. Patel deputy governor menden atema shimshia liasü.
RBI sangdong ajangasa, “Dr. Patel ya International Monetary Fund (IMF) nunga inyaka aruogo. 1996-97 küm pa Reserve Bank nungi IMF nung inyaka liasü, iba menden nung lia pai market, banking sector reforms, pension fund reforms, aser foreign exchange market terenlok atema shisatsü agütsü,” ta ashi.
1998 küm nungi 2001 küm tashi Ministry of Finance (Department of Economic Affairs) nunga pa Consultant inyaka liasü.
Paisa Reliance Industries, IDFC Ltd, MCX Ltd aser Gujarat State Petroleum Corporation densema public aser private sectors nunga inyaka aruogo.
Patel-i Yale University nungi economics nung PhD angu,  University of Oxford nungi M Phil aser University of London nung BSc degree ngua liasü.