Taoba UN lenisang, Annan-i Myanmar nüburtem den ajurutep

Sittwe, September 07 (Agencies): Taoba United Nations (UN) lenisang, Kofi Annan-i Myanmar nung kin kidong balala rong nung rara adokba ajanga pei talidak toktsür jenokdak balala nung jenoka alirtem den tsüngdong ajurutepa senden ka tanü, Bodbar nü menogo.
Myanmar kübok Rakhine State nung Rakhine Buddhist lisopur aser Rohingya Muslim kin na tsüngda adokba mangatettepbaren bentettsütsü nükjidong nung Myanmar lenila, Aung San Suu Kyi-i Annan-i aniba züngsem 9 densemba UN Rakhine Advisory Commission  shimja lir.
Rakhine Buddhist aser Rohingya Muslim kin na tsüngda 2012 küm nungi tenzüka mangatettep adoka tongpang raraba ajanga tanü tashi nung nisung 100 dak tema tepsetba osang bushiteta lir.
Ano, Bangladesh linük nungi arua ozüng alema Myanmar nung jenoka alir ta züngshia, Myanmar senso akümtsü temeten magütsüi alir Rohingya nisung 125,000 shi jenokdak balala nung jenoka alitsüsa tia ajurua lir.
Myanmar senso 6 aser Annan züngsema, bendanger 3 densemba Commissioner 9-i Rakhine State northwest tsütsülen tentetba jenokdak balala semdangba den külemi, Buddhist aser Muslim nisungtem den tanü tsüngdong ajurutepa liasü.
“Annan-i aniba ludeni Rakhine aser Rohingya kin na tsüngda adokba mangatettep ken o bentetja Rakhine State nung tensa tajungba kümdaktsütsü imlar,” ta Dar Paing jenokdak ketdangser, Hla Myint-i tesülen metetdaktsü.
“Rakhine aser Rohingya kin nisungtemi küm noklang ka tejaklen nungi tenzüka aroki lia aru aser tarutsü nunga yimjung nung lidaktsüner,” ta Islam tamangba yimsü lenir, Kyaw Zan-ia lemsatepa liasü.
Annan-i aniba teloki Rakhine State yimtiba, Sittwe nung tentetba Aung Mingalar jenokdaka semdanga police-i nüka alir Rohingya nisung meyirijang jenti den ajurutepba osang jangjaogo.
Ano külen, par linük anema benokba tenokdangba sentongtem maneni agiendaktsütsü nükjidong nung Suu Kyi-ia tan September ita US semdangtsü sentong renema lir.