Rouhani-i Saudi sorkar merenshitsü atema Muslim nisungtem ayonger

Saudi Arabia kübok Mecca yimti nung tentetba Grand Mosque kübok Kaaba külemküjak lungbangba Muslim temeshi aini aortemi nokdaka aliba noksa nung angur. Tan Honibar nü nungi tenzüka agitsü renemba Hajj sentong tenzükba jakdang Muslim nunger meyirijang aikati Mecca tonga lir. (Mecca, September 07)

Tehran, September 07 (Agencies): Saudi Arabia sorkar merenshitsü atema alima ajunga nung Muslim nisungtem ka küma lungjemtsü tayongzüka olen ka Iran Tir, Hassan Rouhani-i tanü, Bodbar nü sangoktsüogo.
Yaküm, 2015 küm agiba Hajj temeshi aini aoba sentong nung Saudi sorkari ozüng alema inyakba atema par sorkar merenshitsü asoshi Rouhani-i tanü tayongzükba olenji sangoktsü.
“Regional linüktem aser alima ajunga nung Islam tamangba yimsü benshirtemi ka küma lungjemer Saudi sorkar nem tapet temerenshi agütsütsü ayongzüker,” ta Rouhani-i par cabinet senden nung metetdaktsü.
“Saudi sorkari hajj ken o nung dang aibelen ka asübo iba ken o angatetteptsü lenmang ngutetla. Ajisüaka, par sorkari asen region nung ozüng alema inyaktsü ajungmesoba den külemi, Iraq, Syria aser Yemen nung alir Muslim nisungtem indang azü tokshidaktsütsüsa kiralongrartem pusema nungitba kuli ngua lir,” ta pai ashi.
Yaküm, 2015 küm nungi tenzüka Iran aser Saudi Arabia linük na tsüngda tesendaktep kanga mejungi aruba sülen kümshia ayonga agiba Hajj temeshi aini aoba sentong tan Honibar nü tenzükba jakdang par linük ana tsüngda mangatettep adokshia, par linük ana tsüngda tesendaktepji tang taoba mapang nungi kanga agi tamajungba kümogo.
Ano, taküm May ita amenba security & logistics senden nung par linük ana tsüngda adokba mangatettep ken o mebentettsüsa sülen küm 30 nung tan mezüngsüa, Hajj sentong nung shilem magidaktsütsü tenokdangba Iran nüburtem anema benoka lir.
“Yaküm küm agiba Hajj sentong nung Iran nübur noklang aika densema, nisung 2,300 shi ajemset,” ta shia, Iran’er Supreme Leader, Ayatollah Ali Khamenei-ia nisung tepsetba ken o nung Saudi sorkar aitsüba olen ka tanü metetdaktsüogo.