Election merüktettsü asoshi

Nagaland nung tashiyim aser ochimashi tenzükdak temenen tera tongtibaji election agiba maparen ya lir ta ajaki kuli sütetter. Ibayongji, Naga nunger ajaki election timi aginür. Tang tashi nung agiba election yagibo candidate-temang takoksaba aser nübortemang takoksaba ta nisung ajak akoksadagi. Iba jagi arogo, yimten aser lokti tentet ajaki election merüka agitsü indang kanga süokia ia jembi tenzükogo. Atangji, election timi magitetba ya ajungbena atalokba mapa ka masü saka taoba küm 40 shi tsüngda tanem-tanemi menenyonga aruba mapa ka lir. Mezüngbo candidate-temi tantsü tambu tongtibang nisung nem kambol kaka agüja tenzük südi, iba sülen lanurtem nem t shirt agütsü, iba sülen sen terara lemtsü aser yi amshi, iba sülen sen teimba-teimba küma amshia vote agütsütsü pur mesüzük saka iba sülenbo prangpong amshia nübortem tsübudakja tashiyim amshitsü apuso. Iba amaji tanem tanemi mesüzüka aruba tangbo memesüzüker saka kar sen agi alir aser kar tashiyim agi tashi angadaktsür. Ibayongji, election temer asen lima merenloktetter. Tanü asen lima nung asenok chirnurtem azüngdak kaketreju tajung makaba, mozü kidang taneptsü mengutetba, electric light  aser tzü tajemtsü agi anüngba, alu yimnüseta meyimtetba, alu lenmang meyanglutetba, lenmang majungba, government office-tem office memesük akümba, ozüng shitak mamshitetba, lanurtem zünger mapa mangu kidang kazütsüsa akümba aser item dakji alaka ano business tilaka inyaktsüa mekoki tensa mejungi akümba timtem ajak ya election junga magitetba ajanga lir. Iba jagi asenok ajaki election majungba indang jembir. Ajisüaka, ibai election majung aser memerük masü saka asenok mulungjang memerük aser asen mapa majungba ajanga asenoksasa asenok timtemba mapang ka lir. Anungji, election merüktettsü indang jembidang election masü asenok merüktettsüla ta senso ajaki angateta pei akok shilem tajung agitsüla. Aji oda, election merüktettsüba mapa nung nisung shia shilemji electoral roll nung tenüng khen dang zülutsü, pei vote mayoktsü, election anogo nung kechisüdir süaka pei vote peisasa enoktsü, tangar melen vote meinoktsütsü aser tashiyim mamshitsüba mapatem asütsü. Iba shilemji arogoi mesüra lokti kari arua asenok melen inyaktsütsüba mapa masü saka asensasa aseni tangatetba tajung agi shilem agitsüba mapatem lir. Asenok aikati election temerbo candidate-baji adokyonga majurutettsü ta bilema election nung pei vote melen sen teraka meshir jangotsü, süoshi mesüra ki oset kar alir, ano kari candidate dang sen meshir tanur school nung admission agitsür. Asenoki asenoksasa külaokba mapatemji itemji lir. Election nung sen tera meshia oset kar aliba agi election temerbo ayangdaka maka timatemer. Aji oda, election nung sen tera meshia tanurbo admission agitsütet saka küm piyong fee magütsüteter aser tanüngba küm pezü tsüngda tanurtem angati züngtettsüsa government school tajung maka taküm raksaa adoker. Itemji asenoki election nung aibelenba ajanga asen semchir semnur tashi timtemtsüsa takoksa angubatem asütsü. Ano, asenok rongnung aikati election ya temenen mapa amato bilemer, anungji election nung pei vote agütsüi maor. Ibajisa tamajungba, kechiyong election ajanga dang asenok alima nung libalirua aotsüba maparen ajak lemtettsü. Election agiba ya temzüng ozüng yanglur aser yimsüsürtem shimtsü atema agir, anungji iba election nung shir adokdir, parnok jagi asen lima aser nübortem asoshi telemtetba agir. Aji oda, yimsüsürtemi junga mebilemdangi asen lima nung tzü mopong majungtsüsa aser asenok akoksatsüsa telemtetba agira, asenoki election mapang shilem magiyonga iba telemtetba ajanga bener aruba takoksa aser timtem nungibo asenok ajentsü makoktsü. Ibayongji, tanü putu nung ‘politics’ mendeni oxygen mopong tajunga magitettsü ta jembir aser ibaji shitak lir. Aji oda, asenoki asen aliba lima ya topur junga kümzüka yunüra, lenmang tajung nung jajanüra, asen li nung terenlok mapa inyaknüra aser asen chirnurtem mapa inyakdak lenmang sadema lapoktsünüra vote mayoktsüla aser election nung kechisüdirsüaka pei vote enoktsüibosa aotsüla.