Naga nunger atema Nagamese ya külem oshi südaktsütsüla : CL John

Kohima, September 7 (TYO): Nagaland nung alirtem ajangzüktsü atema Nagamese oshi nung ozüng ajanga agütsüba temetentem indang kakettem adoktsüla, ta Rural Development & REPA Minister, CL John-i tanü ashi.
Asen state-i Indian Penal Code mebenokdang nungi Naga nungertemi sobaliba ozüngtem amshia aru aser iba jagi Naga nunger aikati legal rights junga memetet, ta Kohima Law College 37 buba Freshers Meet nung o jembidang CL John-i ashi.
Iba asoshi Nagamese oshi nung legal rights meyipzük nung ajungtsü, ta paisa shisem.
Minister-isa Naga nunger asoshi Nagamese ji külem oshi ka ama amshitsü indang onük jembidang, “Naga nunger atema külem oshi ka mali, kin o kin tsüngda meputepba ajanga Naga nunger tsüngda telemsa adokdaktsür. Tesüiba mapang Tenyidie mesüra Ao oshiji külem oshitem ama amshi saka tanübo itemji mamshir” ta metetdaktsü.
Külem oshi ka jembibaji public tesemtem aser teloktenji nung kanga tongtibang kechiyong ibaji ajanga Naga nunger tsüngda tali angatetteptsü, ta paisa ashi.
CL John-isa lanurtem dang mapa inyaktsü indang yimya sübatsü tayongzükba agütsüba den külemi lanuputu dang takok angur nisung ka ka asütsü atema meranga inyaktsü aser bendanga agütsütsü mepishia metetdaktsü.
“Naga lanurtem, talisa lawyer temi asen meketa aliba Bar Associations nung adentsü aser Nagaland nung dang masü saka linük kübok tesem balala nung ken o tem agizüka mapa inyaktsüla” ta CL John-isa ayongzük.
Sentong nung Kohima Law College Principal, Visevonuo P. Pienyü-ia freshers ayongzüka jembidang, temeten atema inyaktsü aser pei taküm nung takok angutsü atema alizüngtem ayutsü ashi.
Sentong nung mendenji KLSU vice president Hikavi H. Kinimi liasü, Kohima Law College Students’ Union (KLSU) president, Laknyei Phom-i presidential address agütsü aser Kivitoli Swu-i freshers tenüng nung o jembi.
Mennie Mekro-i temoatsü meshia sarasadem, S. Birila aser Nongoseno Richa nati ken aten aser KLSU general secretary, Rachabemo S. Ovung-i anküp tepela o jembi.