India-i kiralongrartem sen agi yarir:Pakistan

Islamabad, September 8 (Agencies) : India Ato Kilonser Narendra Modi-i, Pakistan nungi kiranglongrartem adoker aser item jagi alima asünger, ta ashiba sülen, Pakistan-ia, India-i kiralongrartem sen agi yarir aser sepai yimsüsüba nungiter, ta ashi.
Foreign Office nung otongdar Nafees Zakaria-i, “India-i sepai yimsüsüna nungitba ajanga Pakistan kechi koma anga masü kümdaktsür,” ta hopta shia olemtep akaba mapang ashi.
Modi-i South Asia nung linük ka kijai linüktem nung kiralongraba mapa prokshir ta shiogo aser shitakba jembidi süra iba linükji India nung koda, ta Zakaria-i meyipa ashi.
“Kulbhushan (Jadav)-i jembiba o ajanga linük kobai Pakistan telungi ludaktsütsü merangerar kanga jangja angateter,” ta Pakistan-i Balochistan nung India atema idangiter ka lir ta shia iba nisung aputsü jembiba den sentaktepa pai ashi.
Ato Kilonser Nawaz Sharif-i Kulbhushan ken otem UN General Assembly nung benoktsü mebenoktsü ta asüngdangdang pai, India-i Kashmir tebilemtsü nung teka aitba metetdaktsütsü. Kulbhushan tebilemtsüjibo metetdaktsütsübasa kechiyong pai Pakistan nung kiralongra mapatem inyak, ta langzü.
India sepaitemi Kashmir nung meimchir temeden anema inyakba atema kanga sasa ashidang, pai, tan tensa majungi akümba mapang lanur jenti taküm samaogo aser nisung 10,000 dak tema yirur lir, ta ashi.
Yimsüsür 22-i Ato Kilonser tenüng nung linük balala semdanga jajaba mapang India-i Kashimir nung nisung tepseta meimchir temeden anema inyakba metetdaktsü yonga arudar, ta paisa ashi.
Nafees Zakaria-i, “India-i UN nung latetba aser Shimla Tezüngzüktep anema inyakogo,” ta ashi.
Pai, Kashmir tensa alima dang nungi miimtsü atema India-i Balochistan tsütsü jembia sayur, ta ashi.

You must be logged in to post a comment Login