Ni tepsettsü amokmeren osang arur:Eddie Chu

September 8, 2016 nü Legislative Council Assembly nung yimsüsür tasenba Eddie Chu (abelen) osang agütsü atema Wan Chai police station, Hong Kong tonga aruba noksa nung angur.

Hong Kong, September 8 (Agencies) : Hong Kong nung taoba hopta agiba election nung takok ngur tang yimsüsüba meden tasen nung mena alisang Eddie Chu-i, “Election matong dang ni tepsettsü amokmerenba osang police dang ashiba sülen election temer külena kasa osang anosa arur, ta ashi.
Arishi küm 38 tain Chu ya Deobarnü ang Legislative Council assembly nung meden angu.
Eddie Chu ya lipoküm atema inyaker ka lir aser terenlok mapa tasen inyaktsü mechi nung otsüsütsü ki aser osettem raksaba anema pai kanga akhanga nokdaker.
Pai, “Ni mita arshiba aser ozü kibong rangben amokmerenba ajanga ni kidangi moteter,” ta ashi.
“Yimsüsüba nung kü tebilemba tsütsülen nungi kü dangi ni teseptsü osang aru,” ta Chu-i osangbenertem dang ashi.
“Ni kümzüka melitettsüsa tensa tamajung ka anasa arudar…iba tebilemtsü ya taoba anogo ana aser asem tsüngda nungi tamajungba kümogo,” ta Wan Chai police station-i pa okatsür tena külemi aotsü mapang pai ashi.
Iba amokmeren osang shiba nungi mesüra koma sür pa atongar iba osang tejangja pai ano mashi.
Chu atema okatsür Michael Vidler-i police dang iba tebilemtsü shishia agitsü temepishiba ka agütsüogo.
“Yimsüsür ka amokmerenbaji linük aser democracy anemba maparen lir,” ta Vidler-i osangbenertem dang ashi.
“Ozüngi ashiba angatsü aser nisung ajak temeten meteta inyaktsüji Hong Kong police ajak teinyaktsü lir,” ta pai ashi.
Nisung million 7 aliba yimti nung Deobarnü agiba election nung otsüsütsüsa nisung million anati vote agütsü.
2014 küm “Umbrella Movement” tenzükba sülen nungi tang tashi nung ibai mezüng election lir.
Iba election nung independent candidate Chu-i vote 80,000 agi takok angubaji tanga candidate aika dang nungi timba liasü.
Iba election nung pro-independence activist tem aika shilem magidaktsü aser parnok rongnung nisung anatibo parnok shilem magidaktsüba anema ken o benoktsü shiogo, ta osangbenertemi ashi.
Liberal Party Pro-establishment candidate Ken Chow-ia, pro-Beijing candidate tem sadema shilem agidangtsütsü mechi kü danga iba election nung shilem magitsü ashi, ta aija shiogo.