Colombia Police ketdangser 16 tashi tsükset: Carlos Villegas

Bogota, August 05 (Agencies): Colombia police-i ketdang asüba helicopter tayimtsü ka tanü Bodbar nü Colombia northwest tsütsü tenemlen tsükokba osang ka Colombia defence minister, Luis Carlos Villegas-i metetdaktsüogo.

“Tanü tayimtsü tsükokba lendong nung police ketdangser 16 tashi tsüksetba osang tang tashi nung jangjaogo,” ta pai metetdaktsü.

Paisa ashiba agi, US nung yangluba UH-60 Black Hawk tayimtsüi mechanical timtem kar ajurua mesüra tsüngsang mejungi akümba ajanga tsükok.

“Clan Usuga ta ajaba ozüng alema mozü mora shibelenba telok züngsemtem mitsü maparen inyakdang helicopter tayimtsüji Bogota yimtiba nungi northeast tsütsüleni kilometer 450 shi pilar tenemlen tsükok,” ta Villegas-i osang jangjashitsü.

Nisung 2000 dak tema anisang, Clan Usuga lenisang, Dario Antonio Usuga aputsüsa osang tejangja agütsür nem senpet sen million 5 tashi agütsütsü asoshi US sorkaria nangzüka lir.

“Tanü agiba mitba sentong nung helicopter 3 tashi amshia liasü. Ajisüaka, tanüngba tayimtsü 2 nung mena alirtemi prangpong injang yokba ola mangashiba yong tanü tayimtsüji tsünsang majungba ajanga tsükok ta bilemer saka bushisüngdang agiba sülen ang osang tejangjabo metetetsü,” ta Villegas-i ashi.