Sep 12 nungi 2 buba Captain Kenguruse asayamung tenzüktsü

Kohima, September 8 (TYO) : September 12 nungi 19, 2016 tashi Kohima nung 2 buba Captain Kenguruse Memorial Football Tournament asayatsü.
Iba asayamung ya Inspector General Assam Rifles (North) aser Headquarters 3 Corps kübok 5 Sector Assam Rifles ajanga ayongzüker.
Taküm iba asayamung nung telok 24-i shilem agitsü aser parnok rongnung district 11 nungi Associations & Clubs 21 aser uniformed teams asem- 164 TA Battalion, IGAR(N) aser DGP XI nungertem  lir.
September 12 nü Kohima Local Ground nung IGAR(N) Maj. Gen. MS Jaswal-i iba asayamung tenzüktsütsü aser mezüngbuba asayaji anepdang 10:00 ako nung Addax Youth Club aser United Sporting Club tsüngda asayatsü.
Asayamung nung mezüngbuba anogo ananüji ground ana- Tsiese Basa Ground aser Kohima Local Ground nung asayatsü aser September 14 nungibo Kohima Local Ground nung dang asayatsü aser September 19 nikongtsütsü 3:00 ako nung final asayatsü.
Captain Kenguruse, Mahavir Chakra-i linük kümzüka ayutsü atema raradang taküm bendanga agütsüba bilemteta aser ano state nung saisapongba lanurtem ajungmesotsü atema Assam Rifles-i iba asayamung ayongzüker.
Asür Captain Kenguruse ya Kohima district kübok Nerhema yimer liasü aser pa ya Ghatak Platoon nung lenir liasü. Kargil War nung par telok nem Drass Sector nung aliba ‘Black Rock’ tesem tsükchir ket nungi agitsü atema mapa lemzüktsü. Captain Kenguruse-i anir sepaitemi iba tesem makdoktsü merangdang tsükchirtemi parnok dak injang kahloktsü aser iba mapang tasütait Naga nunger Kenguruse kanga mejungi yiru, ajisüaka pai par platoon anir tenemlak tonga atu.
Asür Captain Kenguruse yirua liaka, pai kanga dang tasü itta tsükchirtem makdoktsü merang aser pai tsükchirtem dak rocket launcher ka kahloktsü, pa indang rifle agi nisung ana kahset aser pa indang commando knife agi tsükchir ana tepset.