Half-Marathon nung Thongdi Chang aser Wecheteu nati takok angu

September 8, 2016 nü IG Stadium nung “Run Raise Respond” omen nung ajemdaker Half Marathon asemtepba sentong Home Commissioner, Abhijit Sinha, IAS-i flag off sütsüba noksa nung angur.

Dimapur, September 8 (TYO) : September 8, 2016 nü Henley Venture Group Pvt Ltd-i Department of IT den yaritepa IG stadium nung Half-Marathon ka ayongzüka asemtep.
Iba sentong nung tongti tesemdangerji Home Commissioner, Abhijit Sinha, IAS liasü aser pai o jembidang, entrepreneurs ajungkettsü merangba atema tayonger nem tenüngsang agütsü.
Nagaland state nung rongsenren dak sendakba mapa teimbaka sorkari inyaker ajisüaka  alima sasep nungbo entrepreneurship ajanga inyaker. Asen state nung Tourism aser IT sectors nung teinyaktsü aika lir. iba marathon asemtepba ajanga entrepreneurship tangatetba ajungmesotsü aser ibaji ajanga rongsen inloktsü, ta Abhijit-isa ashi.
UK nunger shishilembar Nigel Eastwood-i iba sentong ayongzükba nung tongti shilem agir aser pai ashiba agi, “Nütsüng yongsük miliion 50 shi aliba North-East state tem nung taginübatem aika lir aser itemji entrepreneurs ajanga tongtettsü.”
Act East policy nung ajemdaker yimtitem nungi company tulutemi China, Thailand aser tanga linüktem nung shishilembatsü maongka agitsü. Anungji, asenoki tang iba maongkaji agitsü atema renema atatsüla, ta Nigel-isa ayongzük.
Tanü asemtepba nung nisung 150 shi-i shilem agi aser teburtem shilem nung Thongdi Chang-i mezüngbuba jenjang, Chikong Chang-i tanabuba jenjang aser Mangrien Wanslop-i tasembuba jenjang nungsa takok angu.
Ano, tetsürtem shilem nunga Wecheteu-i mezüngbuba, Vikuosanuo Sophie-i tanabuba aser Danielle L. Jamir-i tasembuba jenjangtem nungsa takok angu. Takok angur shia nem kulikaktet ka ka agütsü.
North-East Entrepreneurs ajungkettsü nükjidong nung Shillong, Guwahati, Kohima aser Imphal nung iba asemtepba sentong ayongzüka agir.