Angami, Lotha & Ao kaketshirtemi sorkar nem anogo 5 züngzüktsür

Dimapur, September 8 (TYO): August 24, 2016 nü onoki Principal Secretary ajanga Chief Minister dangi shidi ka nung NBSE-i agiba tatidang aser Higher & Technical Education ajanga sangoktsüba result ji tatembang asütsüla ta takhangba agütsü, saka iba asoshi sorkari telangzüba kecha magütsüi arur, September 7, 2016 nü osangkakettem nung Sorkari Eastern Nagaland College Students’ Union (ENCSU) tsüngdang nangzükba osang angashidang onok kanga aoksar, ta Angami Students Union (ASU), Lotha Students Union (LSU) aser Ao Kaketshir Mungdang (AKM) mendenpurtemi sangdong ka nung metetdaktsü.
State sorkari ENCSU dang nangzükbaji onoki akhangba anema lir. May 30, 2016 nü Government Notification ka agütsüba nung “Backward tribe reservation kübok temsüa aliba candidate tem melira, item mendenji de-reserved asütsü aser merit nung ajemdaker category I kübok aliba candidate tem nem lemzüktsütsü” ta lateta lir. Iba nungji ajemdaker menden 4 ‘de-reserved’ asü aser nübo shimokertem osang metetdaktsüogo, ta ASU, LSU aser AKM külem sangdong nung shia lir.
Kaketshir shia indang tarutsüji kanga tongtibang aser parnok asentzü alua inyakba ajanga tajungtiba jenjang nguteta menden angu, anungji koba result sangdongogo ibaji memelenshitsüla, ta ASU president, Dievi Yano, LSU speaker, Abenthung Tsopoe aser AKM president, L. Jemti Longchar nungeri sangdong nung shia lir.
Iba tatembang takhangba ya anogo pongunü tsüngda agizüka inyaktsüla, aji ta mesüra onoki onok temeten atema raratsü, ta parnokisa metetdaktsü.