AKM aser Nagaland Mines & Minerals-i MGHSS nem tenla tajung agütsü

Mokokchung, September 09 (TYO): Mayangnokcha Government Higher Secondary School (MGHSS)  platinum Jubilee amungba nüngtem nung Brihostibarnü Ao Kaketshir Mongdang-i Nagaland Mines & Minerals den senteper school nem angati tzü tajemtsü (Aquaguard) tenlaogo.
Tetushi tejaoker EAC Mokokchung, Livitoli Sukhalu-i free drinking water facility ji lapoktsü. Iba sentong nung jembidang lai temang anema alitsü atema tzü temerük aser tzü tajung ajemtsüji nüngdakba indang lemsatep.
AKM Tir, L. Jemti Longchar-ia iba tenla atema Nagaland Mines & Minerals Managing Director, Moa Jamir  dang pelaba metetdaktsüba den külemi paisa, kasa facility ji NI Jamir Government Higher Secondary School aser IMDH, Mokokchung nunga agütsütsü, ta metetdaktsü.
L Jemti-isa kaketshirtem dang, tang tasen tenlaba facility nungjagi tzü ajemtsü ajungshiba den külemi ibaji tajungtiba nung anepalu amshitsü ayongzük.
Yashi lapoktsüba facility ji  Associate Pastor Kumlong Baptist Church,  Zulu Jamir-i meshiteta sarasademtsü.
Iba sentong nung MGHSS Jubilee Choir-i ken aten aser Principal MGHSS, Arenla-i lokti pelaa agizüka liasü.