Rio Paralympics: Basha-i Powerlifting nung 4 buba jenjang angu

Rio de Janeiro, September 09 (Agencies): Yashi, Brehostibar nü nungi tenzüka asayaba Rio Paralympics asayamong Powerlifting tetoktepba nung India nunger Farman Basha-i kanga meranga shilem agi saka pai 4 buba jenjang ang ngua, medal mongutetsüsa jenjang ajuruogo.
Basha-i tebur temang touzük seret 49 taret shilem nung seret 140 taret 1 buba round nung takok ngua ajungket saka 2 buba aser 3 buba round nung seret 150 aser 155 takok ngua majungkettetba yong pai 4 buba jenjang ang ngua, bronze medal tera agi dang magizük.
Kasa tetoktepba nung Vietnam nunger Le van Cong-i 3 buba round nung seret 181 takok ngua ajungketa gold agizükba den külemi, world record tasen yanglua liasü.
Cong sülen anidaka, Jordan nunger Qarada Omar-i seret 177 ajungketa silver aser Hungary nunger Tunkel Nandor-i seret 155 ajungketa bronze agizükba osang jangjaogo.
Discus aoner, Amit Kumar Saroha-ia tebur discus throw F52 final nung 7 buba jenjang ajangzükba osang angazükogo.
Iba tetoktepba nung Latvia nunger Aigars Apinis-i gold, Poland nunger Robert Jachimowicz-i silver aser Croatia nunger Velimir Sandor-i bronze agizüka liasü.