Jila nung alirtem nem sorkari ki 70,000 agütsütsü: R Tohanba

Kohima, September 09 (TYO): Union Ministry of Housing & Urban Poverty Alleviation kübok Nagaland nung Pradhan Mantri Awas Yojana- Housing for All (Urban) scheme atema tanü Hotel Japfu, Kohima nung tang mezüng Hotel Japfu Urban Local Bodies (ULBs) den State Level Consultative Meeting kaogo.
Municipal Affairs Department-i ayongzükba senden nung Municipal & Town Councils 23 nungi ketdangsertem den jembidang Municipal Affairs Parliamentary Secretary, R. Tohanba-i, tang Nagaland nung jila/yimtitem nung oa litepba nung temelenshi adokdar, koba ajanga jilatem nung nütsüng timba akümer aser yimtsüngtem nung nütsüng tajemba akumer, ta metetdaktsü.
Pai ashiba agi, küm ter tejaklenbo yimtsüng terenlok nung rangloker inyak, ajisüaka jilatem nung nütsüng timba akumba ajanga Centre sorkaria tangbo yimti/jilatem nung rangloker inyaker, ibayongji terenlok mapa balala dak alia JNNURM aser National Urban Livelihood Mission ama mapatong tenzükogo.
PMAY-HFA (Urban) mapatong ya jilatem nung ki maliba tebilemtsü malitsü asoshi lir, koba ajanga ki malirtem mesüra ki tila alirtem takdang süloktsü atema parnok nem subsidy agütsür.
Iba dak sentakba nung Parliamentary Secretary-i ULBs ketdangsertem dang, iba nükjidong ataloktsü asoshi kanga nendaka inyaktsüla, ta ayongzük.
Iba mapatong atema ULBs aser Department na kanga amalitepa inyaktsü imlar, ta shia Tohanba-isa, “2022 küm tashi nungbo iba scheme kübok nisung 70,000 nungi lakh ka tashi nembosa tajangzük agütsütsü asoshi Department-i nükjidong yur inyaktsüla,” ta ashi.
“ULBs election magiba ajanga ULBs terenlok senotsü nung state-i takoksa tulu ngudar,” ta pai sasaba olen ka ashi.
Ajisüaka tetsürtem nem menden shilem 33% shitetja Municipal election agitsü atema Cabinet-i telemtetba agiogo, ta paisa ashi.
Naga Mothers’ Association-i tetsürtem nem menden shiteta yutsütsü asoshi Supreme Court nung ken o agütsüba sülen  court-i rongshiba ajanga iba telemtetba agi masü, ta paisa metetdaktsü.
“Naga lokti sobaliba nung telemtetba agiba maparen nung tetsürtem memelar, saka tensa mapang melenshiba den külemi parnok nema kasa maongka agütsütsüla,” ta pai ashi.
“Maongka dang agütsüra tetsürtema kasa temsüa lir aser khuret ajak bentettsüsa shisatsü lir,” ta paisa shisem.
Housing for All (HFA) ya state nung aliba ULBs 23 prongla nung benoka inyakdar, aser maneni tawa sangdongba town council tenetji-a Ministry-i züngoktsü imlar.
Iba scheme nung power-point presentation agütsüdang Municipal Affairs Assistant Director, Kevilenuo Solo-i, HFA mission ji maneni 2022 tashi inyaktsü aser iba jagi state nung recognised urban area ajak ayimjemtsü, ta metetdaktsü.
Iba scheme kübok küm ka nung income kecha malir nungi sen lakh 3 tashi angurtemi iba tajangzük angutsü akok.
Iba sentong ya Commissioner & Secretary, Menukhol John leniba nung agi aser Joint Secretary, Kevekha Kevin Zehol leniba nung shisalemsatepa liasü.