Zakir Naik-i Rajiv Foundation nem agütsüba senji sübokrem lir: BJP

New Delhi, September 10 (Agencies): Honibarnü BJP-i, Zakir Naik indang Islamic Research Foundation (IRF)-i Rajiv Gandhi Foundation nem sen lakh 50 tenla agütsübaji pai (Zakir) ozüng alema inyakba mapatem nembangtsü atema agütsüba sübokrem lir, ta aitsü.
BJP otongdar, Ravi Shankar Prasad-i, “Tangbo Congress-i, parnoki senji meyipa agütsüogo ta jembir, saka IRF-ibo parnoki senji meyipa mangu ta ashir. Ni asüngdangnübaji- Kechiba 2012 küm security agency temi Zakir Naik’er Peace TV indang report tamajung agütsüdang Congress-i iba senji meyipa magütsü?” ta ashi.
BJP leniirsa ashiba agi, Rajiv Gandhi Foundation nung Mendenbubaji Congress Tir, Sonia Gandhi liasü aser züngsemtemji taoba mapang Ato kilonser, Manmohan Singh, taoba Union Finance Minister, P Chidambaram, Rahul Gandhi aser Priyanka Gandhi Vadra nunger liasü.
“2012 küm December 4 nü taoba mapang Information & Broadcasting Minister, Manish Tiwari-i Parliament nung, security agency temi ozüng alema inyakba foreign channels 24 jangjaogo ta metetdaktsü. Item channels ji tashishitsü aketba aser security lendong aketbatem liasü,” ta Prasad-i ashi.
“Item (channels) rongnungji Naik indang Peace TV dena liasü. Kechiba Congress-i 2012 küm nungijisa senji meyipa magütsü,” ta paisa asüngdang.
Paisa, sen agizüktsü atema Foreign Contribution Regulation Act (FCRA) kübok Rajiv Gandhi Foundation ji registratation agia ali asü, ta takhangba agütsü.
Tanga NGO ka nem sen magütsüdangyongi IRF-i Home Ministry dang nungi temelaba magi, ta pai ashi.
“Sen lakh 50 tashiji IRF-i parnoki ozüng alema inyakbatem nembangtsü atema sübokrem agütsüba südi, ta onoki kodaser melung melemi mejembitettsü,” ta BJP lenirisa shisem.