Samsung-i Korea dang Galaxy Note 7 amshiba anentsü ashi

Seoul, September 10 (Agencies) : Honibarnü Samsung Electronics-i South Korea nunger dang Galaxy Note 7 smartphone tasenba mamshitsü metetdaktsüogo. Iba phone aika nung mi adoka raksaba ajanga company-i meyipa reprangshitsü tenzükogo.
South Korea nung amenoka aliba technology tettsüti Samsung-i linük nung Galaxy Note 7 amshirtemi company indang service center tem nung iba smartphone melena, khen amshia atema tanga phone meshitsü sangdongogo.
September 19, 2016 nü nungi Samsung-i Galaxy Note 7 nung battery tasen inoka yanglur ayoktsü sentong lir, ta company sangdong ka ajanga metetdaktsü.
“Onok indang oset kanga sapua amshirtem ajak dang onoki taitok meshir,” ta sangdong nungjisa shia lir.
U.S. Federal Aviation Administration-i Brihostibarnü iba smartphone tayimtsü nung mamshitsü metetdaktsüogo.
Iba smartphone nung rechargeable lithium aliba ajanga mi adokdaktsür ta putetba sülen Samaung Galaxy Note 7 phone million 2.5 sarudena yanglushitsü sangdongogo.
Tang tashi nung iba smartphone 35 tashi nung mi adokba putetogo aser miji phone charge asüdang timba adoker. Iba smartphone ya August 19, 2016 nü sayaba lir.