Thangavelu-i gold & Bhati-i bronze agizük

Rio Paralyimpics

Rio de Janeiro, September 10 (Agencies): India nunger paralympics asayar, Mariyappan Thangavelu aser Varun Bhati nati tebur high jump T-42 tetoktepba nung gold aser bronze medal agizükogo.
Thangavelu-i 1.89m alema 1 buba jenjang angu aser Bhati-i 1.86m alema bronze medal-ji agizük.
Kasa tetoktepba nung America nunger Sam Grewe-i 2 buba jenjang ngua, silver agizüka liasü.
T-42 ya tangar memeneper, temokok temelen rangdoker alir track aser field athletes atema ayongba tetoktepba lir.
Arishi küm 20 tain Thangavelu-i tan gold agizükba sülen tan asayamong nung shilem India asayar rong nung gold agizüker 1 buba asayar kümogo.
1972 küm Heidelberg nung tzüwatsü gold agizüksang, Murlikant Petkar aser 2004 küm Athens nung Javelin Throw gold agizüker, Devendra Jhajharia na sülen anidaka, Thangavelu ya Paralympics asayamong nung India tenüng nung gold agizüker asayar 3 buba akümer lir.
Thangavelu o Bhati nati medal agizükba züngsema, India teloki tan Paralympics asayamong nung gold 3, silver 3 aser bronze 4 densema, ajak agi medal 10 tashi agizükogo.
Tamil Nadu State kübok Salem nungi kilometer 50 shi pilar, Periavadagampatti nunger Thangavelu arishi küm 5 tain alidang bus gari lendong nung densema, pa tetsüng achijilen shilem ka rangdoktsüsa akümba osang jangjaogo.
Uttar Pradesh nunger arishi küm 21 tain Bhati-a tanur asüdang polio tashidak agi shirangba sülen pa tetsüng külen mejungi aküm saka pai 2014 China Open Athletics Championship gold agizüka liasü.
Ano külen, tan gold agizüka India nem konang tulu bener arutsüba nüngtem nung Tamil Nadu sorkari Thangavelu nem sen crore 2 tashi senpet agütsütsü renemba osang ka Tamil Nadu Chief Minister, J. Jayalalithaa-ia tanü sangoktsüogo.