ABAM Canaan Farmers’ School Training takok ngua agiogo

Dimapur, Sept. 11 (TYO): ABAM-i ayongzüka Canaan Farmers’ School Training Sept. 6 -9, 2016 anogotem nung Razuphema, Dimapur nung agiogo. Iba sentong nung shisalen sayurtemji Dr. Sashiyangba, APO, Land Resource Dept. Govt. of Nagaland, Rev. I. Wati Jamir, Asso. Pastor, DABA aser Rev. Dr. Mar Atsongchanger, Executive Secy., ABAM liasü.
Kasa sentong nungsa Rev. O. Alem, Principal, DBC, Medziphema Ao Baptist Arogo Pastor, Wb. Anungba Imsong aser Khanakhuru Ao Baptist Arogo Pastor, Wb. Lima Tzüdir nungertemi Tsüngrem Osang abenba nung shilem agia liasü.
ABAM  Central  Council  (2015) nung iba sentong agizüker,  tang tashi nung sentong  tasembenbuba agiogo. Canaan Farmers’ School nükjidongji,  nisung ka taküm nung shisa-mulung melenshia, anünga aliba anogotem nung pa/la meküta aliba tesem nung temelenshi koda adokdaktsütsü, aser itemji Laishiba nung ajemdaker tesayuba tasen agütsür. (Community transformation with a mind-set  change). Ano aluyimba/atsüki anepalutsü,  aseni yanglutetba ali mol (manure) amshia alu koda ayimtsu item tesayuba tongmelang agi sayutsü.  Iba sentong nung Ao Arogotem nungi nisung 32 tena tangazükba tajung  aser temoatsü ngua dena liasü.